Ekijaqty kezdesýde Mańǵystaý oblysy men Ózbekstan Respýblıkasynyń arasyndaǵy ekonomıkalyq baılanystardy odan ári nyǵaıtý, óńir aralyq kásipkerlikti damytýdyń ınvestısıalyq múmkindikteri men perspektıvalary talqylandy.
Ózbekstan Respýblıkasy men Mańǵystaý oblysy arasyndaǵy syrtqy saýda aınalymy 2021 jyly 7,9 mln AQSH dollaryn qurady. Onyń ishinde eksport – 672,6 myń AQSH dollaryn, ımport – 7,3 mln AQSH dollaryn quraıdy.
Mańǵystaý oblysynda ekonomıkanyń túrli salalarynda ózbek kapıtalynyń qatysýymen 84 kásiporyn tirkelgen.
Áýe qatynastaryn damytý maqsatynda osy jyly alǵashqy ret Aqtaý jáne Úrgenish qalalary arasynda aptasyna 3 ret jıilikpen qatynaıtyn turaqty reıs iske qosyldy. Sonymen birge, aptasyna 3 ret Aqtaý-Nókis qalalary arasynda turaqty reıs iske qosyldy.
Kezdesý sońynda taraptar ekonomıkanyń túrli salalarynda naqty jobalardy iske asyrý úshin yntymaqtastyqty jalǵastyrýǵa daıyn ekendikterin bildirdi.
