Brifing barysynda oblys ákimi Nurlan Noǵaev jumys berýshi men jumysshy arasyndaǵy eńbek daýlaryn sheshetin QR Eńbek zańnamasynyń arnaiy algoritmi bar ekenin atap ótti.
– Eger eńbek daýlaryna qatysty qandai da bir suraqtar týyndasa, azamattar úshin QR Eńbek zańnamasy aiasynda arnaiy algoritm bar ekenin túsiný qajet. Sondyqtan ereýilder uiymdastyryp, óz talaptaryn kóshege shyǵyp aitýdyń qajeti joq. Ol úshin kelisim komissiiasy, arbitraj jáne eńbek inspektsiiasy siiaqty zańdy quraldar bar, – dedi oblys ákimi.
Sondai-aq, óńir basshysy eńbek shartyn qurǵan eki tarap ózderine alǵan mindettemelerdi saqtaýǵa tiis ekenin aitty.
– Ómir bolǵan soń, eńbek daýynyń týyndaýy zańdylyq. Alaida, mundai máselelerdiń aldyn alý úshin jumys berýshi men jumysshy kelisim shartty aldyn-ala oqyp, qol qoiyp sodan keiin sharttyń talaptaryn oryndaýǵa mindetti. Eger azamat qandai da bir jalaqyǵa jumysqa ornalasýǵa kelisse, ol ózine qabyldaǵan mindettemelerdi saqtaýy kerek. Al jumys berýshi jalaqyny, áleýmettik járdemaqylardy jáne shartta kózdelgen basqa da aqshalai qarajatty ýaqtyly tóleýge mindetti. Eńbek daýlary eńbek inspektsiiasy, jumys berýshi men jumysshy arasynda sheshilýge tiis. Ókinishke orai, bizde eńbek máselelerin zańsyz sheshýge tyrysqan faktiler bar. Jumysshylar ereýilge shyǵady. Biz quqyqtyq memleketpiz, sondyqtan eńbek qatynastary qoldanystaǵy zańnama aiasynda ashyq jáne ádil sheshilýi tiis, – dedi oblys ákimi.
Brifing sońynda óńir basshysy aimaq turǵyndaryn arandatýshylyq pen popýlistik urandarǵa boi aldyrmaýǵa shaqyryp, óńir aldynda júieli sheshimderdi talap etetin birqatar mindettiń baryn atap ótti. Jergilikti atqarýshy organdar bul baǵytta jumys júrgizip jatyr.
– Qazir bilimmen, ǵylymmen básekelesetin ýaqyt. «Teginde adam balasy adam balasynan aqyl, ǵylym, ar, minez degen nárselermen ozady» dep uly oishyl Abai Qunanbaiuly áldeqashan aitqan. Sondyqtan oblys turǵyndaryn halyq pen el igiligi úshin sabyr saqtap, ár sheshimdi aqylmen qabyldaýǵa shaqyramyn. Biz barlyq qiyndyqty birge eńseremiz, – dedi óńir basshysy.
