بريفينگ بارىسىندا وبلىس اكىمى نۇرلان نوعايەۆ جۇمىس بەرۋشى مەن جۇمىسشى اراسىنداعى ەڭبەك داۋلارىن شەشەتىن ق ر ەڭبەك زاڭناماسىنىڭ ارنايى الگوريتمى بار ەكەنىن اتاپ ءوتتى.
– ەگەر ەڭبەك داۋلارىنا قاتىستى قانداي دا ءبىر سۇراقتار تۋىنداسا، ازاماتتار ءۇشىن ق ر ەڭبەك زاڭناماسى اياسىندا ارنايى الگوريتم بار ەكەنىن ءتۇسىنۋ قاجەت. سوندىقتان ەرەۋىلدەر ۇيىمداستىرىپ، ءوز تالاپتارىن كوشەگە شىعىپ ايتۋدىڭ قاجەتى جوق. ول ءۇشىن كەلىسىم كوميسسياسى، اربيتراج جانە ەڭبەك ينسپەكسياسى سياقتى زاڭدى قۇرالدار بار، – دەدى وبلىس اكىمى.
سونداي-اق، ءوڭىر باسشىسى ەڭبەك شارتىن قۇرعان ەكى تاراپ وزدەرىنە العان مىندەتتەمەلەردى ساقتاۋعا ءتيىس ەكەنىن ايتتى.
– ءومىر بولعان سوڭ، ەڭبەك داۋىنىڭ تۋىنداۋى زاڭدىلىق. الايدا، مۇنداي ماسەلەلەردىڭ الدىن الۋ ءۇشىن جۇمىس بەرۋشى مەن جۇمىسشى كەلىسىم شارتتى الدىن-الا وقىپ، قول قويىپ سودان كەيىن شارتتىڭ تالاپتارىن ورىنداۋعا مىندەتتى. ەگەر ازامات قانداي دا ءبىر جالاقىعا جۇمىسقا ورنالاسۋعا كەلىسسە، ول وزىنە قابىلداعان مىندەتتەمەلەردى ساقتاۋى كەرەك. ال جۇمىس بەرۋشى جالاقىنى، الەۋمەتتىك جاردەماقىلاردى جانە شارتتا كوزدەلگەن باسقا دا اقشالاي قاراجاتتى ۋاقتىلى تولەۋگە مىندەتتى. ەڭبەك داۋلارى ەڭبەك ينسپەكسياسى، جۇمىس بەرۋشى مەن جۇمىسشى اراسىندا شەشىلۋگە ءتيىس. وكىنىشكە وراي، بىزدە ەڭبەك ماسەلەلەرىن زاڭسىز شەشۋگە تىرىسقان فاكتىلەر بار. جۇمىسشىلار ەرەۋىلگە شىعادى. ءبىز قۇقىقتىق مەملەكەتپىز، سوندىقتان ەڭبەك قاتىناستارى قولدانىستاعى زاڭناما اياسىندا اشىق جانە ءادىل شەشىلۋى ءتيىس، – دەدى وبلىس اكىمى.
بريفينگ سوڭىندا ءوڭىر باسشىسى ايماق تۇرعىندارىن ارانداتۋشىلىق پەن پوپۋليستىك ۇراندارعا بوي الدىرماۋعا شاقىرىپ، ءوڭىر الدىندا جۇيەلى شەشىمدەردى تالاپ ەتەتىن ءبىرقاتار مىندەتتىڭ بارىن اتاپ ءوتتى. جەرگىلىكتى اتقارۋشى ورگاندار بۇل باعىتتا جۇمىس جۇرگىزىپ جاتىر.
– ءقازىر بىلىممەن، عىلىممەن باسەكەلەسەتىن ۋاقىت. «تەگىندە ادام بالاسى ادام بالاسىنان اقىل، عىلىم، ار، مىنەز دەگەن نارسەلەرمەن وزادى» دەپ ۇلى ويشىل اباي قۇنانباي ۇلى الدەقاشان ايتقان. سوندىقتان وبلىس تۇرعىندارىن حالىق پەن ەل يگىلىگى ءۇشىن سابىر ساقتاپ، ءار شەشىمدى اقىلمەن قابىلداۋعا شاقىرامىن. ءبىز بارلىق قيىندىقتى بىرگە ەڭسەرەمىز، – دەدى ءوڭىر باسشىسى.
