Nurjan Nurlanov bul qyzmetke 2019 jyldyń aqpan aiynda taǵaiyndalǵan bolatyn. Qańtar oqiǵasynan keiin onyń ákesi Nurlan Nyǵmatýlin QR Parlamenti Májilisiniń tóraǵasy qyzmetinen ketken edi.
Sodan beri biliktiń jalyna myqtap jarmasqan Nyǵmaýlinderdiń yqpaly álsirei bastaǵan-dy. Desekte, Nyǵmatýlinder mańaiyn toptasqan adamdar óz yqpalyn joǵaltpaý úshin baryn salatyny anyq.
Osyǵan deiin Nurjan Nyǵmatýlin basqaryp kelgen «QazMunaiGaz-Aero» «Samuryq-Qazyna» Ulttyq kompaniiasynyń quramyna kiretin kóptegen kompaniialardyń biri bolady.
Atalymysh kompaniia 2014 jyly qurylǵan bolatyn. Úkimettiń Qaýylysymen «QazMunaiGaz-Aero» kompaniiasy QR Qorǵanys ministrligine, QR UQK Shekara qyzmetine, Ulttyq gvardiiaǵa jáne Tótenshe jaǵdailar ministrligine qajetti benzin, dizel otyny, mazýt jáne avia janarmai jetkizetin birden-bir kompaniia bolyp bekitilgen-di.
Iaǵni, «QazMunaiGaz-Aero» kompaniiasy ózderiniń ónimin kimderge satamyz dep bas aýyrtqan emes. Munai óńdeý zaýyttarynan qajetti janarmaidy alyp, satyp alýshyǵa esh qinalmai jetkizip beredi.
Mundai kompaniiany ýniversitetti jańadan bitirgen kez kelgen adam basqaryp ketetini anyq. Sondyqtan 2014 jyldan beri Nurjan Nurlanov «QazMunaiGaz-Aero» kompaniiasyn damytý úshin jarǵaq qulaǵy jastyqqa timei eńbek etti dep aitýǵa kelmeidi.
Mundai kompaniialar turǵanda elimizde shaǵyn jáne orta biznes erkin damidy dep aitýdyń ózi qiyn.
Qazirgi tańda ár oblysta janar-jaǵarmai jetkizý isimen ainalysatyn shaǵyn kompaniialar bar. «QazMunaiGaz-Aero» syndy kompaniialar olardy tunshyqtyryp otyrǵany jasyryn emes.
Úkimettiń jekelegen kompaniianyń múddesin qorǵap arnaiy Qaýyly shyǵaryp, kúshtik qurylymdardyń sol kompaniiadan janarmai satyp alýyn mindettep qoiý naryqtyń zańdylyǵyna qaishy áreket.
Sondyqtan qandaida bir qyzmetti monopoliialap alǵan mundai kompaniialardy tarqatyp, olardyń ornyna básekege qabiletti kásipkerlerdi tartý kerek.
Búginde ár oblysta áskeri bólimder, shekara jáne tótenshe jaǵdai qyzmeti jumys istep tur. Olarǵa sol óńirdegi shaǵyn kompaniialar janar-jaǵarmai jetikizip, beretin múmkindik bolsa, óńirlerde kásipkerlik pen básekelestik jaqsy damityn edi.
Barlyq maily jilikti «QazMunaiGaz-Aero» kompaniiasyna ustata salýdan utylmasaq, utpaimyz. Sondyqtan Jańa Qazaqstanda naryqty monopoliialap alǵan mundai oryn bolmaýy kerek.
