نۇرجان نۇرلانوۆ بۇل قىزمەتكە 2019 جىلدىڭ اقپان ايىندا تاعايىندالعان بولاتىن. قاڭتار وقيعاسىنان كەيىن ونىڭ اكەسى نۇرلان نىعماتۋلين ق ر پارلامەنتى ءماجىلىسىنىڭ ءتوراعاسى قىزمەتىنەن كەتكەن ەدى.
سودان بەرى بيلىكتىڭ جالىنا مىقتاپ جارماسقان نىعماۋليندەردىڭ ىقپالى السىرەي باستاعان-دى. دەسەكتە، نىعماتۋليندەر ماڭايىن توپتاسقان ادامدار ءوز ىقپالىن جوعالتپاۋ ءۇشىن بارىن سالاتىنى انىق.
وسىعان دەيىن نۇرجان نىعماتۋلين باسقارىپ كەلگەن «قازمۇنايگاز-اەرو» «سامۇرىق-قازىنا» ۇلتتىق كومپانياسىنىڭ قۇرامىنا كىرەتىن كوپتەگەن كومپانيالاردىڭ ءبىرى بولادى.
اتالىمىش كومپانيا 2014 جىلى قۇرىلعان بولاتىن. ۇكىمەتتىڭ قاۋىلىسىمەن «قازمۇنايگاز-اەرو» كومپانياسى ق ر قورعانىس مينيسترلىگىنە، ق ر ۇقك شەكارا قىزمەتىنە، ۇلتتىق گۆاردياعا جانە توتەنشە جاعدايلار مينيسترلىگىنە قاجەتتى بەنزين، ديزەل وتىنى، مازۋت جانە اۆيا جانارماي جەتكىزەتىن بىردەن-بىر كومپانيا بولىپ بەكىتىلگەن-دى.
ياعني، «قازمۇنايگاز-اەرو» كومپانياسى وزدەرىنىڭ ءونىمىن كىمدەرگە ساتامىز دەپ باس اۋىرتقان ەمەس. مۇناي وڭدەۋ زاۋىتتارىنان قاجەتتى جانارمايدى الىپ، ساتىپ الۋشىعا ەش قينالماي جەتكىزىپ بەرەدى.
مۇنداي كومپانيانى ۋنيۆەرسيتەتتى جاڭادان بىتىرگەن كەز كەلگەن ادام باسقارىپ كەتەتىنى انىق. سوندىقتان 2014 جىلدان بەرى نۇرجان نۇرلانوۆ «قازمۇنايگاز-اەرو» كومپانياسىن دامىتۋ ءۇشىن جارعاق قۇلاعى جاستىققا تيمەي ەڭبەك ەتتى دەپ ايتۋعا كەلمەيدى.
مۇنداي كومپانيالار تۇرعاندا ەلىمىزدە شاعىن جانە ورتا بيزنەس ەركىن داميدى دەپ ايتۋدىڭ ءوزى قيىن.
قازىرگى تاڭدا ءار وبلىستا جانار-جاعارماي جەتكىزۋ ىسىمەن اينالىساتىن شاعىن كومپانيالار بار. «قازمۇنايگاز-اەرو» سىندى كومپانيالار ولاردى تۇنشىقتىرىپ وتىرعانى جاسىرىن ەمەس.
ۇكىمەتتىڭ جەكەلەگەن كومپانيانىڭ مۇددەسىن قورعاپ ارنايى قاۋىلى شىعارىپ، كۇشتىك قۇرىلىمداردىڭ سول كومپانيادان جانارماي ساتىپ الۋىن مىندەتتەپ قويۋ نارىقتىڭ زاڭدىلىعىنا قايشى ارەكەت.
سوندىقتان قاندايدا ءبىر قىزمەتتى مونوپوليالاپ العان مۇنداي كومپانيالاردى تارقاتىپ، ولاردىڭ ورنىنا باسەكەگە قابىلەتتى كاسىپكەرلەردى تارتۋ كەرەك.
بۇگىندە ءار وبلىستا اسكەري بولىمدەر، شەكارا جانە توتەنشە جاعداي قىزمەتى جۇمىس ىستەپ تۇر. ولارعا سول وڭىردەگى شاعىن كومپانيالار جانار-جاعارماي جەتىكىزىپ، بەرەتىن مۇمكىندىك بولسا، وڭىرلەردە كاسىپكەرلىك پەن باسەكەلەستىك جاقسى داميتىن ەدى.
بارلىق مايلى جىلىكتى «قازمۇنايگاز-اەرو» كومپانياسىنا ۇستاتا سالۋدان ۇتىلماساق، ۇتپايمىز. سوندىقتان جاڭا قازاقستاندا نارىقتى مونوپوليالاپ العان مۇنداي ورىن بولماۋى كەرەك.
