Aqmola oblysynyń prokýratýrasy áleýmettik turǵydan osal azamattardy urlap, olardyń atyna iri banktik nesieler rásimdeýmen ainalysqan uiymdasqan qylmystyq topqa (UQT) qatysty qylmystyq isti tergeýdi aiaqtaǵandaryn jariialady. UQT quramyna elimizdiń túrli óńirlerinen 25 adam kirgen. Olardyń arasynda birqatar bankterdiń qyzmetkerleri de bolǵan. Ótken apta sońynda osy habar jariialana salysymen, aty atalǵan bankter bul málimetti joqqa shyǵaryp málimdeme jasady. Alaida, prokýratýra Qazaqstan qarjygerleri qaýymdastyǵynyń bul ýájin negizsiz dep tapty, dep habarlaidy Dalanews.kz.
"2025 jylǵy 4 qyrkúiekte Qazaqstan qarjygerleri qaýymdastyǵy bank qyzmetkerleriniń atalǵan iske qatystylyǵyn teriske shyǵarý jóninde resmi habarlama jariialady. Prokýratýra jariialaǵan aqparat qylmystyq istiń naqty materialdaryna negizdelgenin habarlaidy. QPK-niń 200-babyna sáikes ýákiletti organ – Qazaqstan Respýblikasynyń Qarjy monitoringi agenttiginiń (QR QMA) ortalyq apparatyna bank qyzmetkerleriniń uiymdasqan qylmystyq top qyzmetine qatystylyǵy kórsetilgen usynys engizildi. Sonymen qatar, atalǵan bankter ózge uiymdarmen birge bul is boiynsha jábirlenýshi dep tanyldy jáne olar qylmystyq protseske barlyq quqyqtary bar ókilderi arqyly qatysýda, onyń ishinde sotqa deiingi tergep-tekserýdiń barlyq kezeńderinde qylmystyq is materialdarymen tanysý quqyǵy bar. Osyǵan bailanysty bankterdiń tergelip jatqan is jóninde habarsyzdyǵy týraly ýájderi negizsiz bolyp tabylady", delingen Aqmola oblystyq prokýratýrasynyń málimdemesinde.
Prokýratýra málimetinshe, UQT-nyń qatysýymen 5 jyldan astam ýaqyt boiy alaiaqtyq áreketter jasalǵan. Qylmystardyń qurbany bolǵandar – Respýblika boiynsha 348 azamat. Keltirilgen shyǵyn kólemi 3,7 mlrd teńgeni quraidy.
"Tergeý barysynda qylmystyq jolmen tabylǵan múlikter anyqtaldy: Almaty qalasyndaǵy páterler men jer telimderi, qymbat avtokólikter, iri kólemdegi qolma-qol aqsha. Tárkilengen dúnieniń jalpy quny – 2,7 mlrd teńge. Toptyń barlyq qatysýshylary ustalyp, ýaqytsha ustaý izoliatoryna qamaldy. Qazirgi tańda qylmystyq is protsess qatysýshylaryna tanysýǵa berildi, túpkilikti sheshimdi sot shyǵarady", delingen quzyrly organ habarlamasynda.
Prokýratýra el azamattaryn saq bolýǵa, alaiaqtarǵa senbeýge shaqyrady.
Aita ketsek, aty atalǵan bankter arasynda Kaspi bank, Forte, Jusan bank pen Evraziialyq bank te bar.
