اقمولا وبلىسىنىڭ پروكۋراتۋراسى الەۋمەتتىك تۇرعىدان وسال ازاماتتاردى ۇرلاپ، ولاردىڭ اتىنا ءىرى بانكتىك نەسيەلەر راسىمدەۋمەن اينالىسقان ۇيىمداسقان قىلمىستىق توپقا (ۇقت) قاتىستى قىلمىستىق ءىستى تەرگەۋدى اياقتاعاندارىن جاريالادى. ۇقت قۇرامىنا ەلىمىزدىڭ ءتۇرلى وڭىرلەرىنەن 25 ادام كىرگەن. ولاردىڭ اراسىندا ءبىرقاتار بانكتەردىڭ قىزمەتكەرلەرى دە بولعان. وتكەن اپتا سوڭىندا وسى حابار جاريالانا سالىسىمەن، اتى اتالعان بانكتەر بۇل مالىمەتتى جوققا شىعارىپ مالىمدەمە جاسادى. الايدا، پروكۋراتۋرا قازاقستان قارجىگەرلەرى قاۋىمداستىعىنىڭ بۇل ءۋاجىن نەگىزسىز دەپ تاپتى، دەپ حابارلايدى Dalanews.kz.
"2025 جىلعى 4 قىركۇيەكتە قازاقستان قارجىگەرلەرى قاۋىمداستىعى بانك قىزمەتكەرلەرىنىڭ اتالعان ىسكە قاتىستىلىعىن تەرىسكە شىعارۋ جونىندە رەسمي حابارلاما جاريالادى. پروكۋراتۋرا جاريالاعان اقپارات قىلمىستىق ءىستىڭ ناقتى ماتەريالدارىنا نەگىزدەلگەنىن حابارلايدى. قپك-نىڭ 200-بابىنا سايكەس ۋاكىلەتتى ورگان – قازاقستان رەسپۋبليكاسىنىڭ قارجى مونيتورينگى اگەنتتىگىنىڭ (ق ر قما) ورتالىق اپپاراتىنا بانك قىزمەتكەرلەرىنىڭ ۇيىمداسقان قىلمىستىق توپ قىزمەتىنە قاتىستىلىعى كورسەتىلگەن ۇسىنىس ەنگىزىلدى. سونىمەن قاتار، اتالعان بانكتەر وزگە ۇيىمدارمەن بىرگە بۇل ءىس بويىنشا جابىرلەنۋشى دەپ تانىلدى جانە ولار قىلمىستىق پروسەسكە بارلىق قۇقىقتارى بار وكىلدەرى ارقىلى قاتىسۋدا، ونىڭ ىشىندە سوتقا دەيىنگى تەرگەپ-تەكسەرۋدىڭ بارلىق كەزەڭدەرىندە قىلمىستىق ءىس ماتەريالدارىمەن تانىسۋ قۇقىعى بار. وسىعان بايلانىستى بانكتەردىڭ تەرگەلىپ جاتقان ءىس جونىندە حابارسىزدىعى تۋرالى ۋاجدەرى نەگىزسىز بولىپ تابىلادى"، دەلىنگەن اقمولا وبلىستىق پروكۋراتۋراسىنىڭ مالىمدەمەسىندە.
پروكۋراتۋرا مالىمەتىنشە، ۇقت-نىڭ قاتىسۋىمەن 5 جىلدان استام ۋاقىت بويى الاياقتىق ارەكەتتەر جاسالعان. قىلمىستاردىڭ قۇربانى بولعاندار – رەسپۋبليكا بويىنشا 348 ازامات. كەلتىرىلگەن شىعىن كولەمى 3،7 ملرد تەڭگەنى قۇرايدى.
"تەرگەۋ بارىسىندا قىلمىستىق جولمەن تابىلعان مۇلىكتەر انىقتالدى: الماتى قالاسىنداعى پاتەرلەر مەن جەر تەلىمدەرى، قىمبات اۆتوكولىكتەر، ءىرى كولەمدەگى قولما-قول اقشا. تاركىلەنگەن دۇنيەنىڭ جالپى قۇنى – 2،7 ملرد تەڭگە. توپتىڭ بارلىق قاتىسۋشىلارى ۇستالىپ، ۋاقىتشا ۇستاۋ يزولياتورىنا قامالدى. قازىرگى تاڭدا قىلمىستىق ءىس پروسەسس قاتىسۋشىلارىنا تانىسۋعا بەرىلدى، تۇپكىلىكتى شەشىمدى سوت شىعارادى"، دەلىنگەن قۇزىرلى ورگان حابارلاماسىندا.
پروكۋراتۋرا ەل ازاماتتارىن ساق بولۋعا، الاياقتارعا سەنبەۋگە شاقىرادى.
ايتا كەتسەك، اتى اتالعان بانكتەر اراسىندا Kaspi bank، Forte، Jusan bank پەن ەۆرازيالىق بانك تە بار.
