Ne úshin barmyz? Ómir ne úshin beriledi? Nege adam júregimen tolyqqandy baqytty izdeidi? Balanyń oiyny qanbaityny siiaqty, eresek adam da baqyt izdeýden jalyqqan emes. Kóńil qalyp, júrek qan jylasa da, janymyzdyń túkpirinde alda bir baqyt kútip turǵanyn sezinemiz. Máńgilik, móp-móldir, tek baqyt syilaityn bir mahabbattyń baryna senemiz.
Onyń jaýaby mynada. Adam bir ret qana týmaidy ǵoi. Adamnyń jany máńgilik. Ol túrli tánge qonady. Bir ómirden ekinshi ómirge ótip otyrady. Onyń maqsaty – óziniń ne ekenin seziný, sosyn qainar bulaǵyna qaityp oralý.
Jan degen jaryq. Ǵalamnyń bir bólshegi. Biz ony Jaratqan dep ataimyz. Qainar bulaǵyna oralý degenimiz – óziniń tabiǵatyn seziný. Jaratqanmen úzdiksiz bailanysyn seziný.
Fáni ómirdiń bári eles. Bes kún jalǵan. Biraq ol jazalaý úshin berilmegen. Adam ómirge sabaq alý úshin keledi. Ár adam sanasy tolysqanda ózi biletin bolady. Bul ómirdegi eshbir jetistik pen ataq-dańq, dáýlet pen urpaq oǵan jannyń tynyshtyǵyn bere almasyn túsinedi. Jan baqyt pen mahabbattyń ishki iirimin jattap qalady. Biraq onyń perneleri fánidiń saǵym dúniesimen kómkerilip turǵandyqtan ony taný adamǵa ońaiǵa túspeidi. Adam qalaýyn taba almas jerden izdei beretini de sodan. Ómirde bári ótkinshi. Turaqsyz nárse turaqty baqytty qalai bermek?
Tek júregińe úńilip, janyńnyń túkpirindegi sezim uiyǵyndaǵy tartylys izdegenge jetkizedi. Adam – tek tán emes. Adam degen oiy men sezimi ushtasqan tirshilik iesi. Adam rýhani damyǵan jaratylys. Tek ýaqytsha óz bastaýyn umytqan. Sondyqtan qaiǵy men azapqa tózý arqyly óziniń bastaý bulaǵyna qaita oralady. Jannyń izdegen baqytyn tabý úshin ómir men ózińdi túsin, kim ekenińdi túsin.
Adam osy suraqtarǵa jaýap bere alar deńgeige jetkende ómir ony qoldaýsyz qaldyrmaidy.
Kómek árdaiym bar. Qasynan ótip ketpeseńiz bolǵany. Adamǵa shyn baqytyn taýyp berýge qol ushyn sozatyndar ylǵi da kerek kezde tabylady. Kei jan ózin tanýdyń barlyq satysynan ótip, jan dúniesi Jaratqanmen tabysyp jatady. Olar eń kerekti bilimmen sýsap, rýhani zor qýatqa ie. Olar Rýhani Ustazdarǵa ainalady. Olar jer betine adam balasyna kómektesý úshin túsedi. Olardyń mindeti adamdy eles ómirden jaryqqa jeteleý. Qarańǵy túnnen jaryq kúnge bastaý. Nadandyqtan qutqaryp, bilimniń qainarymen sýsyndatý. Adasýdan aryltyp, aqiqatty tanýǵa umtyldyrý.
Aýdarǵan Shynar ÁBDILDÁ
