ءار ادام ومىردەن باقىت، تىنىشتىق، قۋانىش پەن ماحاببات ىزدەيدى. ءومىردى جاڭا پاراقتان باستاعان سايىن، جاڭا قارىم-قاتىناسقا تۇسكەن سايىن وسىمەن ءبارىن ۋىسىمدا ۇستايمىن دەپ ويلايمىز. ءبىراق اركەز تولىققاندى باقىت بولا بەرمەيدى. قولىڭا قوندىرعان ارمان كەلەسىسىنە جول اشادى. ءسويتىپ باقىت قۋىپ ءومىر وتەدى دە كەتەدى.

نە ءۇشىن بارمىز؟ ءومىر نە ءۇشىن بەرىلەدى؟ نەگە ادام جۇرەگىمەن تولىققاندى باقىتتى ىزدەيدى؟ بالانىڭ ويىنى قانبايتىنى سياقتى، ەرەسەك ادام دا باقىت ىزدەۋدەن جالىققان ەمەس. كوڭىل قالىپ، جۇرەك قان جىلاسا دا، جانىمىزدىڭ تۇكپىرىندە الدا ءبىر باقىت كۇتىپ تۇرعانىن سەزىنەمىز. ماڭگىلىك، ءموپ-مولدىر، تەك باقىت سىيلايتىن ءبىر ماحابباتتىڭ بارىنا سەنەمىز.

ونىڭ جاۋابى مىنادا. ادام ءبىر رەت قانا تۋمايدى عوي. ادامنىڭ جانى ماڭگىلىك. ول ءتۇرلى تانگە قونادى. ءبىر ومىردەن ەكىنشى ومىرگە ءوتىپ وتىرادى. ونىڭ ماقساتى – ءوزىنىڭ نە ەكەنىن سەزىنۋ، سوسىن قاينار بۇلاعىنا قايتىپ ورالۋ.

جان دەگەن جارىق. عالامنىڭ ءبىر بولشەگى. ءبىز ونى جاراتقان دەپ اتايمىز. قاينار بۇلاعىنا ورالۋ دەگەنىمىز – ءوزىنىڭ تابيعاتىن سەزىنۋ. جاراتقانمەن ۇزدىكسىز بايلانىسىن سەزىنۋ.

ءفاني ءومىردىڭ ءبارى ەلەس. بەس كۇن جالعان. ءبىراق ول جازالاۋ ءۇشىن بەرىلمەگەن. ادام ومىرگە ساباق الۋ ءۇشىن كەلەدى. ءار ادام ساناسى تولىسقاندا ءوزى بىلەتىن بولادى. بۇل ومىردەگى ەشبىر جەتىستىك پەن اتاق-داڭق، داۋلەت پەن ۇرپاق وعان جاننىڭ تىنىشتىعىن بەرە الماسىن تۇسىنەدى. جان باقىت پەن ماحابباتتىڭ ىشكى ءيىرىمىن جاتتاپ قالادى. ءبىراق ونىڭ پەرنەلەرى ءفانيدىڭ ساعىم دۇنيەسىمەن كومكەرىلىپ تۇرعاندىقتان ونى تانۋ ادامعا وڭايعا تۇسپەيدى. ادام قالاۋىن تابا الماس جەردەن ىزدەي بەرەتىنى دە سودان. ومىردە ءبارى وتكىنشى. تۇراقسىز نارسە تۇراقتى باقىتتى قالاي بەرمەك؟

تەك جۇرەگىڭە ءۇڭىلىپ، جانىڭنىڭ تۇكپىرىندەگى سەزىم ۇيىعىنداعى تارتىلىس ىزدەگەنگە جەتكىزەدى. ادام – تەك ءتان ەمەس. ادام دەگەن ويى مەن سەزىمى ۇشتاسقان تىرشىلىك يەسى. ادام رۋحاني دامىعان جاراتىلىس. تەك ۋاقىتشا ءوز باستاۋىن ۇمىتقان. سوندىقتان قايعى مەن ازاپقا ءتوزۋ ارقىلى ءوزىنىڭ باستاۋ بۇلاعىنا قايتا ورالادى. جاننىڭ ىزدەگەن باقىتىن تابۋ ءۇشىن ءومىر مەن ءوزىڭدى ءتۇسىن، كىم ەكەنىڭدى ءتۇسىن.

ادام وسى سۇراقتارعا جاۋاپ بەرە الار دەڭگەيگە جەتكەندە ءومىر ونى قولداۋسىز قالدىرمايدى.

كومەك ءاردايىم بار. قاسىنان ءوتىپ كەتپەسەڭىز بولعانى. ادامعا شىن باقىتىن تاۋىپ بەرۋگە قول ۇشىن سوزاتىندار ىلعي دا كەرەك كەزدە تابىلادى. كەي جان ءوزىن تانۋدىڭ بارلىق ساتىسىنان ءوتىپ، جان دۇنيەسى جاراتقانمەن تابىسىپ جاتادى. ولار ەڭ كەرەكتى بىلىممەن سۋساپ، رۋحاني زور قۋاتقا يە. ولار رۋحاني ۇستازدارعا اينالادى. ولار جەر بەتىنە ادام بالاسىنا كومەكتەسۋ ءۇشىن تۇسەدى. ولاردىڭ مىندەتى ادامدى ەلەس ومىردەن جارىققا جەتەلەۋ. قاراڭعى تۇننەن جارىق كۇنگە باستاۋ. ناداندىقتان قۇتقارىپ، ءبىلىمنىڭ قاينارىمەن سۋسىنداتۋ. اداسۋدان ارىلتىپ، اقيقاتتى تانۋعا ۇمتىلدىرۋ.

اۋدارعان شىنار ءابدىلدا