– بۇگىن ءبىر توپ جۇمىسسىز ازامات جاڭاوزەن قالاسى اكىمدىگىنىڭ الدىنا نارازىلىق اكسياسىن ۇيىمداستىرىپ، مۇناي-گاز سالاسىنا جۇمىسقا ورنالاسپايىنشا، اشتىق جاريالايتىندارىن مالىمدەدى.
بۇرىندارى ايتقانىمداي – بارلىعىن ءبىر ۋاقىتتا مۇناي-گاز سالاسىنا جۇمىسقا ورنالاستىرۋ مۇمكىن ەمەس. مەملەكەت ۇسىناتىن جۇمىسقا ورنالاسۋدىڭ بارلىق مۇمكىن نۇسقالارىن پايدالانۋ قاجەت. الايدا، وكىنىشكە قاراي، ءبىزدىڭ كەيبىر ازاماتتارىمىز مۇنى تىڭداعىسى دا، مەملەكەت بەرگەن مۇمكىندىكتى پايدالانعىسى دا كەلمەيدى.
ءبىز قولدانىستاعى الگوريتم بويىنشا جۇمىسقا ورنالاسۋ كەزەگىن كۇتىپ وتىرعان ادامدارعا قيانات جاساي المايمىز. اكىمدىك الدىنا نارازىلىق بىلدىرۋگە شىققانداردى كەزەكسىز جۇمىسقا ورنالاستىرا المايمىز. بۇل ادىلەتسىزدىك بولادى.
ءبىز جۇمىسقا ورنالاسۋدىڭ باسقا بالاماسىن ۇسىنامىز. ءسىز "جۇمىس جاسايمىن" جوباسى اياسىندا جالاقىسى 140-تان 280 مىڭ تەڭگەگە دەيىن بولاتىن بوس جۇمىس ورىندارى تىزبەگىندەگى جۇمىسقا تۇرا الاسىز. ولاردىڭ كوپشىلىگى ءۇشىن جوعارى ءبىلىمنىڭ بولۋى مىندەتتى ەمەس. سونىمەن قاتار بۇل مۇناي-گاز سەكتورىنداعى كەزەگىڭىزدى كۇتۋگە ەشقانداي كەدەرگى كەلتىرمەيدى.
مەنىڭشە بۇل ۇسىنىس – جۇمىسسىز جۇرگەننەن جاقسى، وتباسىڭىزعا قولداۋ بولارى انىق.
جاڭاوزەندە ءوز شەشىمىن تالاپ ەتەتىن ءبىرقاتار ماسەلە بار. ارينە، ونىڭ ءبىرى – حالىقتى جۇمىسپەن قامتاماسىز ەتۋ. ءبىراق كوبىنەسە ارىپتەستەرىمىزبەن بىرگە بار ۋاقىتىمىزدى قالامىزدىڭ وزەكتى ماسەلەلەرىن جۇيەلى شەشۋدەن گورى ميتينگىلەر مەن ەرەۋىلدەرگە جۇمساۋىمىزعا تۋرا كەلەدى.
قۇرمەتتى جەرلەستەر! بىزگە جۇمىس ىستەۋگە مۇمكىندىك بەرسەڭىزدەر!
ءبىزدىڭ ەسىگىمىز سىزدەرگە ءاردايىم ايقارا اشىق. كوپتەگەن قوعام بەلسەندىلەرى ءارتۇرلى ماسەلەلەر بويىنشا ءتۇرلى كوميسسيالارىمىزدىڭ جۇمىسىنا ارالاسىپ، قاتىسىپ كەلەدى. سىزدەردىڭ كومەكتەرىڭىز ءاردايىم قاجەت جانە ءبىز سىزدەرمەن بىرگە ودان دا جاقسى ىستەردى اتقارا الامىز.
ورتاق كۇش-جىگەرىمىزدى حالىق مۇددەسىنە جۇمساي وتىرىپ، قالامىزدىڭ جانە ونىڭ ازاماتتارىنىڭ ءومىرىن جاقسارتاتىنىمىزعا بەك سەنىمدىمىن، – دەدى جاڭاوزەن قالاسىنىڭ اكىمى ايبەك قوسۋاقوۆ.
