Premer-ministrdiń orynbasary Serik Jumanǵarin Biz Birgemiz qorynyń quryltaishysy Perizat Qairattyń ustalýyna qatysty pikir bildirdi, dep habarlaidy Dalanews.kz.
Jýrnalister qordyń quryltaishylarynyń qatarynda 10 adamnyń bolǵanyn jáne olardyń basym bóligi partiia músheleri ekenin atap ótti. Osyǵan bailanysty sheneýnikke “Bul jaǵdai Amanat partiiasynyń jáne qaiyrymdylyq institýtynyń bedeline nuqsan keltirmei me?” degen saýal qoidy.
“Bul jańalyqty egjei-tegjeili zerttemedim. Ókinishke qarai, meni asa tańǵaldyra qoiǵan joq. Sońǵy kúnderdegi qarbalasqa bailanysty nazarymnan tys qaldy”, – dep jaýap berdi ol Ulysmedia.kz agenttigine.
Sondai-aq sheneýnikterge áleýmettik jelidegi sán-saltanatqa toly jazbalarynan keiin tekserý jumystary júrgizile me degen suraq qoiyldy.
Buǵan Jumanǵarin: “Árkim óz jumysyn atqaryp jatyr”, – dep qysqa qaiyrdy.
Aita keteiik, QMA eriktiler qozǵalysynyń belsendisi jáne BizBirgemizQazaqstan qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizilip jatyr.
Ol kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy dep kúdikke ilindi.
Qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna paidalanyldy.
Biyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraityn elordanyń premiým sanattaǵy "Akbulak Riviera", "Highvill Ishim Gold", "Kók Jailaý" TK (turaq oryndaryn qosa alǵanda), sondai-aq "Vela Village" kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan.
Bul elderde ol "Cartier" jáne "Louis Vuitton" siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan.
Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
16 qarasha kúni Qarjy monitoringi agenttigi Eriktiler qozǵalysynyń belsendisi Perizat Qairatqa qatysty tergeý faktisi boiynsha qosymsha aqparatty jariialady. Agenttik Perizat Qairattyń Palestinaǵa dep aqsha jinap, 200 mln teńgeden asa qarajatty jymqyrǵanyn rastady.
Sonymen qatar Biz Birgemiz qorynda Perizat Qairattan bólek 10 quryltaishy bar ekenin Dalanews.kz "Ulysmediaǵa" siltep habarlaǵan edi.
Resmi ashyqderekkózderdegi málimet boiynsha, qordyń alǵash Astana qalasynyń Ádilet departamenti 2021 jyly qarashada tirkegen. Qordyń tolyq ataýy – "Biz Birgemiz Qazaqstan 2030" qoǵamdyq birlestigi.
Qordyń quryltaishylarynyń tiziminde Perizat Qairattyń ózimen qosqanda 10 adam bar. Olar:
- Matiýshenko Sergei Vladimirovich
- Maǵzum Arslanbek Talǵatuly
- Turǵanbai Shadiiar Doktoruly
- Amanbai Arýjan Orazbaiqyzy
- Bolysov Tohtar Kommýnarovich
- Hismatýllin Damir Sakenovich
- Serikjanova Aigerim Teljanovna
- Seitkamal Gúlnaz Nurlanqyzy
- Hafiz Aian Baýyrjanuly.
Tizimdegi quryltaishylardyń birazynyń esimi Amanat partiiasymen bailanysty. Máselen, Sergei Matiýshenko partiianyń Astana qalasy Baiqońyr aýdandyq filialynyń atqarýshy hatshysy. Elordalyq Azamattyq aliansty direktory bolǵanyn áleýmettik jelide jazady. Ózin jelide qazaq tilin biletin ýkrain dep tanystyrady.
