پرەمەر-مينيستردىڭ ورىنباسارى سەرىك جۇمانعارين Biz Birgemiz قورىنىڭ قۇرىلتايشىسى پەريزات قايراتتىڭ ۇستالۋىنا قاتىستى پىكىر ءبىلدىردى، دەپ حابارلايدى Dalanews.kz.
جۋرناليستەر قوردىڭ قۇرىلتايشىلارىنىڭ قاتارىندا 10 ادامنىڭ بولعانىن جانە ولاردىڭ باسىم بولىگى پارتيا مۇشەلەرى ەكەنىن اتاپ ءوتتى. وسىعان بايلانىستى شەنەۋنىككە “بۇل جاعداي Amanat پارتياسىنىڭ جانە قايىرىمدىلىق ينستيتۋتىنىڭ بەدەلىنە نۇقسان كەلتىرمەي مە؟” دەگەن ساۋال قويدى.
“بۇل جاڭالىقتى ەگجەي-تەگجەيلى زەرتتەمەدىم. وكىنىشكە قاراي، مەنى اسا تاڭعالدىرا قويعان جوق. سوڭعى كۇندەردەگى قاربالاسقا بايلانىستى نازارىمنان تىس قالدى”، – دەپ جاۋاپ بەردى ول Ulysmedia.kz اگەنتتىگىنە.
سونداي-اق شەنەۋنىكتەرگە الەۋمەتتىك جەلىدەگى ءسان-سالتاناتقا تولى جازبالارىنان كەيىن تەكسەرۋ جۇمىستارى جۇرگىزىلە مە دەگەن سۇراق قويىلدى.
بۇعان جۇمانعارين: “اركىم ءوز جۇمىسىن اتقارىپ جاتىر”، – دەپ قىسقا قايىردى.
ايتا كەتەيىك، قما ەرىكتىلەر قوزعالىسىنىڭ بەلسەندىسى جانە BizBirgemizQazaqstan قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتىر.
ول كوكتەمگى سۋ تاسقىنىنان زارداپ شەككەن ازاماتتارعا كومەكتەسۋ ءۇشىن جينالعان 1،5 ملرد تەڭگەدەن استام قاراجاتتى جىمقىردى دەپ كۇدىككە ءىلىندى.
قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا پايدالانىلدى.
بيىل كوكتەمدە ول ەلورداداعى اۆتوسالونداردا 88 ملن تەڭگەگە "Mercedes-Benz S450"، 80 ملن تەڭگەگە "Lexus LX-600" جانە 39 ملن تەڭگەگە "Haval" اۆتوكولىكتەرىن ساتىپ الدى.
وسى كەزەڭدە ول جالپى سوماسى 600 ملن تەڭگەنى قۇرايتىن ەلوردانىڭ پرەميۋم ساناتتاعى "Akbulak Riviera"، "Highvill Ishim Gold"، "كوك جايلاۋ" تك (تۇراق ورىندارىن قوسا العاندا)، سونداي-اق "Vela Village" كوتتەدج قالاشىعىندا جىلجىمايتىن مۇلىك نىساندارىن ساتىپ الدى.
سونىمەن قاتار، قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات ق. دۋباي، دوحا، لوندون جانە ستامبۋلداعى «St. Regis»، «Shangri-La»، «Palazzo Versace» جانە «Kempinski» سياقتى بەس جۇلدىزدى قوناق ۇيلەردە دەمالعان.
بۇل ەلدەردە ول "Cartier" جانە "Louis Vuitton" سياقتى برەندتەردىڭ قىمبات اكسەسسۋارلارى مەن زەرگەرلىك بۇيىمداردى ساتىپ الىپ، فەشەنەبەلدى مەيرامحانالارعا بارىپ، ياحتالاردى جالداعان.
قىلمىستىق سحەمانى جۇزەگە اسىرۋ ءۇشىن دوستارى مەن تۋىستارىنا 8% سىياقى بەرىپ، قوردىڭ اقشاسى قولما-قول اقشاعا اينالدىرىپ وتىرعان.
وسىلايشا، پەريزات ق. ءوزىنىڭ زاڭسىز ارەكەتتەرىمەن ەرىكتىلەر قوزعالىسىنىڭ بەدەلىنە نۇقسان كەلتىرىپ، ونىڭ اشىقتىق پەن ادالدىق پرينسيپتەرىنە كۇمان كەلتىردى جانە حالىقتىڭ سەنىپ تاپسىرعان قاراجاتىن تالان-تاراجعا سالعان.
16 قاراشا كۇنى قارجى مونيتورينگى اگەنتتىگى ەرىكتىلەر قوزعالىسىنىڭ بەلسەندىسى پەريزات قايراتقا قاتىستى تەرگەۋ فاكتىسى بويىنشا قوسىمشا اقپاراتتى جاريالادى. اگەنتتىك پەريزات قايراتتىڭ پالەستيناعا دەپ اقشا جيناپ، 200 ملن تەڭگەدەن اسا قاراجاتتى جىمقىرعانىن راستادى.
سونىمەن قاتار Biz Birgemiz قورىندا پەريزات قايراتتان بولەك 10 قۇرىلتايشى بار ەكەنىن Dalanews.kz "ۇلىسمەدياعا" سىلتەپ حابارلاعان ەدى.
رەسمي اشىقدەرەككوزدەردەگى مالىمەت بويىنشا، قوردىڭ العاش استانا قالاسىنىڭ ادىلەت دەپارتامەنتى 2021 جىلى قاراشادا تىركەگەن. قوردىڭ تولىق اتاۋى – "Biz Birgemiz Qazaqstan 2030" قوعامدىق بىرلەستىگى.
قوردىڭ قۇرىلتايشىلارىنىڭ تىزىمىندە پەريزات قايراتتىڭ وزىمەن قوسقاندا 10 ادام بار. ولار:
- ماتيۋشەنكو سەرگەي ۆلاديميروۆيچ
- ماعزۇم ارسلانبەك تالعات ۇلى
- تۇرعانباي شاديار دوكتور ۇلى
- امانباي ارۋجان ورازباي قىزى
- بولىسوۆ توحتار كوممۋناروۆيچ
- حيسماتۋللين دامير ساكەنوۆيچ
- سەريكجانوۆا ايگەريم تەلجانوۆنا
- سەيتكامال گۇلناز نۇرلان قىزى
- حافيز ايان باۋىرجان ۇلى.
تىزىمدەگى قۇرىلتايشىلاردىڭ ءبىرازىنىڭ ەسىمى Amanat پارتياسىمەن بايلانىستى. ماسەلەن، سەرگەي ماتيۋشەنكو پارتيانىڭ استانا قالاسى بايقوڭىر اۋداندىق فيليالىنىڭ اتقارۋشى حاتشىسى. ەلوردالىق ازاماتتىق اليانستى ديرەكتورى بولعانىن الەۋمەتتىك جەلىدە جازادى. ءوزىن جەلىدە قازاق ءتىلىن بىلەتىن ۋكراين دەپ تانىستىرادى.
