Akademik Asqar Jumadildaev Nazarbaev tusynda eshqandai marapat almaǵanyn, alaida biyl joǵary dárejeli marapatqa ie bolǵanyn aitty, - dep habarlaidy Dalanews.kz.
Ǵalym Respýblika kúni qarsańynda Toqaevtyń qolynan "Qazaqstannyń Eńbek eri" ataǵyn alǵan bolatyn.
"Anda-sanda "Alla taǵala beremin dese, terezeden tastai salady" dep qaljyńdaimyn. Nazarbaevtyń kezinde de usynylǵanmyn. Biraq eshqaisy bolmady. Osy joly qyzyq boldy. Akademiia "Astanaǵa bar. Biz seni "Qurmetke" usynǵanbyz" dedi. Sosyn ""Qurmetti" jas balalar alyp jatyr ǵoi, uiat emes pe, jas balalarmen jaǵalasyp júrgenim" dep qaljyńdadym. "Zań sondai" dedi. Eń aldymen "Qurmet" bolady eken, sodan keiin bes jyl ótýi kerek eken. Zańy, tártibi bar eken. Sóitsem mende birde bir orden joq eken, medaldar bar eken. ...Olar esepke alynbaidy eken, orden bolýy kerek eken. Aqyr sońynda bir kún qalǵanda bardyq. Prezidenttiń arnaiy ereksheligi bolady eken. Bireýdi túrmeden shyǵaramyn dese shyǵarýyna bolady. Bireýge ataq-dańq beremin dese, bere alady. Patshanyń aty patsha ǵoi. Oǵan qarsy kelmeisiń. Sóitsem, "Qurmetke" jiberilgen eken. Aqyr sońynda ol kisi qarapty daǵy (ózgertkizgen - esk.). Ras-ótirigin bilmedim", - dedi ǵalym ASSYLTAS TV-ǵa bergen suhbatynda.
Akademik marapat alǵan kúngi qyzyq oqiǵany baiandap berdi.
"23-i kúni berdi. Sol kúni Astanada sumdyq keptelis boldy. Taksidi shaqyramyn, taksi kelmeidi. Aqordaǵa jetý úshin 3-4 taksi shaqyrdym. Avtobýstyń aialdamasyna kelip turdym. Bir stýdentter tanydy. Bir avtobýsqa otyrdym da, solai qarai tarttym. Avtobýs bir saǵat júredi eken. Bir ýaqytta jettim. Telefonmen habarlasyp qoimaidy. Bireýler "gazetke shyǵypty ǵoi, qutty bolsyn marapat" deidi. Ne marapat ekenin bilmeimin. ...Ne kerek, áiteýir, avtobýspen bardym", - dedi Asqar Jumadildaev.
Onyń sózinshe, Nazarbaevtyń tusynda ǵalymdar mundai marapat almaǵan.
"Meniń ordenimniń arǵy betinde 52 sany tańbalanyp tur. Osy sátke deiin bul tósbelgi 52 adamnyń keýdesine taǵylypty. Sonyń teń jartysyn Nazarbaev tabystaǵan eken. Biraq Esimovke, iri holding bastyqtaryna, ustazdarǵa, dárigerlerge, aqyn-jazýshylarǵa bergen eken. Ǵalymdarǵa bermegen. Ras-ótirigin bilmedim, "ǵalymdardan birinshi maǵan berip otyr" dedi ǵoi", - deidi akademik.
Aita keteiik, biyl "Qazaqstannyń Eńbek Eri" ataǵyn alǵandar qatarynda Prezident janyndaǵy Qazaqstan Respýblikasynyń Ulttyq ǵylym akademiiasynyń vitse-prezidenti, akademik Asqar Jumadildaev ta boldy.
