اكادەميك اسقار جۇمادىلدايەۆ نازاربايەۆ تۇسىندا ەشقانداي ماراپات الماعانىن، الايدا بيىل جوعارى دارەجەلى ماراپاتقا يە بولعانىن ايتتى، - دەپ حابارلايدى Dalanews.kz.

عالىم رەسپۋبليكا كۇنى قارساڭىندا توقايەۆتىڭ قولىنان "قازاقستاننىڭ ەڭبەك ەرى" اتاعىن العان بولاتىن. 

"اندا-ساندا "اللا تاعالا بەرەمىن دەسە، تەرەزەدەن تاستاي سالادى" دەپ قالجىڭدايمىن. نازاربايەۆتىڭ كەزىندە دە ۇسىنىلعانمىن. ءبىراق ەشقايسى بولمادى. وسى جولى قىزىق بولدى. اكادەميا "استاناعا بار. ءبىز سەنى "قۇرمەتكە" ۇسىنعانبىز" دەدى. سوسىن ""قۇرمەتتى" جاس بالالار الىپ جاتىر عوي، ۇيات ەمەس پە، جاس بالالارمەن جاعالاسىپ جۇرگەنىم" دەپ قالجىڭدادىم. "زاڭ سونداي" دەدى. ەڭ الدىمەن "قۇرمەت" بولادى ەكەن، سودان كەيىن بەس جىل ءوتۋى كەرەك ەكەن. زاڭى، ءتارتىبى بار ەكەن. سويتسەم مەندە بىردە ءبىر وردەن جوق ەكەن، مەدالدار بار ەكەن. ...ولار ەسەپكە الىنبايدى ەكەن، وردەن بولۋى كەرەك ەكەن. اقىر سوڭىندا ءبىر كۇن قالعاندا باردىق. پرەزيدەنتتىڭ ارنايى ەرەكشەلىگى بولادى ەكەن. بىرەۋدى تۇرمەدەن شىعارامىن دەسە شىعارۋىنا بولادى. بىرەۋگە اتاق-داڭق بەرەمىن دەسە، بەرە الادى. پاتشانىڭ اتى پاتشا عوي. وعان قارسى كەلمەيسىڭ. سويتسەم، "قۇرمەتكە" جىبەرىلگەن ەكەن. اقىر سوڭىندا ول كىسى قاراپتى داعى (وزگەرتكىزگەن - ەسك.). راس-وتىرىگىن بىلمەدىم"، - دەدى عالىم ASSYLTAS TV-عا بەرگەن سۇحباتىندا.

اكادەميك ماراپات العان كۇنگى قىزىق وقيعانى بايانداپ بەردى. 

"23ء-ى كۇنى بەردى. سول كۇنى استانادا سۇمدىق كەپتەلىس بولدى. تاكسيدى شاقىرامىن، تاكسي كەلمەيدى. اقورداعا جەتۋ ءۇشىن 3-4 تاكسي شاقىردىم. اۆتوبۋستىڭ ايالداماسىنا كەلىپ تۇردىم. ءبىر ستۋدەنتتەر تانىدى. ءبىر اۆتوبۋسقا وتىردىم دا، سولاي قاراي تارتتىم. اۆتوبۋس ءبىر ساعات جۇرەدى ەكەن. ءبىر ۋاقىتتا جەتتىم. تەلەفونمەن حابارلاسىپ قويمايدى. بىرەۋلەر "گازەتكە شىعىپتى عوي، قۇتتى بولسىن ماراپات" دەيدى. نە ماراپات ەكەنىن بىلمەيمىن. ...نە كەرەك، ايتەۋىر، اۆتوبۋسپەن باردىم"، - دەدى اسقار جۇمادىلدايەۆ.

ونىڭ سوزىنشە، نازاربايەۆتىڭ تۇسىندا عالىمدار مۇنداي ماراپات الماعان.

"مەنىڭ وردەنىمنىڭ ارعى بەتىندە 52 سانى تاڭبالانىپ تۇر. وسى ساتكە دەيىن بۇل توسبەلگى 52 ادامنىڭ كەۋدەسىنە تاعىلىپتى. سونىڭ تەڭ جارتىسىن نازاربايەۆ تابىستاعان ەكەن. ءبىراق ەسىموۆكە، ءىرى حولدينگ باستىقتارىنا، ۇستازدارعا، دارىگەرلەرگە، اقىن-جازۋشىلارعا بەرگەن ەكەن. عالىمدارعا بەرمەگەن. راس-وتىرىگىن بىلمەدىم، "عالىمداردان ءبىرىنشى ماعان بەرىپ وتىر" دەدى عوي"، - دەيدى اكادەميك.

ايتا كەتەيىك، بيىل "قازاقستاننىڭ ەڭبەك ەرى" اتاعىن العاندار قاتارىندا پرەزيدەنت جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسىنىڭ ۆيسە-پرەزيدەنتى، اكادەميك اسقار جۇمادىلدايەۆ تا بولدى.