Jaqynda Halyqaralyq zertteýshi jýrnalister konsortsiýmy (ICIJ) Timýr jáne Dinara Qulybaevtardyń Eýropadaǵy jyljymaityn múlkine arnalǵan kartasyn jariialady, dep habarlaidy Dalanews.kz jýrnalist Dmitrii Shishkinniń zertteýine siltep.
Máselen, Londonnyń Beiker-stritindegi páterlerge ielik etken Dariǵa Nazarbaeva týraly aitar bolsaq. BAQ málimetinshe, ol negizgi aktivterin satqanymen, keibir múlikteri áli de ózinde. Nazarbaevtar Eýropadaǵy jáne basqa da sheteldegi jyljymaityn múlikterdi kóptegen offshorlyq kompaniialar arqyly ielengen.
Ulybritaniia: The Bishops Avenue, London. Benefitsiar: Nurali Áliev
Bishop-aveniýdegi úige Dariǵa Nazarbaevanyń uly Nurali Áliev Karib teńizinde tirkelgen Manrick Private Foundation qory arqyly ielik etedi. Britaniialyq reestr derekterine sáikes, 2014 jylǵy baǵalaý boiynsha bul jyljymaityn múliktiń quny 1 million fýnt sterlingten asady.
32, Denewood Rd, Highgate. Benefitsiarlar: Dariǵa Nazarbaeva, Endriý Djon Beiker
Bul saraiǵa Lihtenshteinde tirkelgen Villa Magna Foundation qory ielik etedi. Britaniia reestrleriniń málimetinshe, benefitsiarlar retinde Dariǵa Nazarbaeva men Endriý Djon Beiker kórsetilgen. Baǵalaý quny – 9,3 million fýnt sterling.
Meifer aýdany, London. Benefitsiar: Timýr Qulybaev / Vitala Investment Holding S.à.r.I. (Liýksembýrg) jáne Lynn Properties S.à.r.I. (Liýksembýrg).
2007 jyly Timýr Qulybaev baqylaityn bes kompaniia Ulybritaniiadan jalpy quny 184 million AQSh dollaryna alty jyljymaityn múlik satyp aldy. Sol alty múliktiń úsheýi Londonnyń eń qymbat aýdany sanalatyn Meiferde ornalasqan.
Eń qymbat tórt qabatty georgian stilindegi taýnhaýs 41 Upper Grosvenor St. mekenjaiynda ornalasqan. Ol 2024 jyldyń naýryzynda 44 million dollarǵa satylǵan.
Osy mekenjaiǵa jaqyn 42 Upper Grosvenor St. ǵimaratynda Qulybaevtyń ieligindegi tórt qabatty neoklassikalyq ǵimarat bar (Vitala Investment Holding S.à.r.I kompaniiasy arqyly satyp alynǵan). Liýksembýrg kompaniiasynyń 2022 jylǵy sońǵy qarjylyq esebine sáikes, bul múliktiń quny shamamen 22 million dollar.
Sol kvartaldyń qarama-qarsy jaǵynda Qulybaev baqylaityn taǵy bir liýksembýrgtik Lynn Properties S.à.r.I kompaniiasyna tiesili eki qabatty úi 42 Reeves Mews mekenjaiynda ornalasqan. 2022 jylǵy qarjy esebinde onyń quny 18 million dollar dep kórsetilgen.
ICIJ málimetteri boiynsha, 2007 jyly Qulybaev Londonnyń Kensington aýdanyndaǵy «millionerler kóshesi» atalyp ketken jerde taǵy eki jyljymaityn múlik satyp alǵan. Jalpy quny – 54,5 million dollar. Bul aktivter Kaiman araldarynda tirkelgen APH Property Trust Ltd. kompaniiasy arqyly basqarylǵan. Qulybaev «trasttyń quryltaishysy» retinde kórsetilgen. Aita ketý kerek, sol jyly Qazaqstannyń burynǵy prezidentiniń kúieý balasy Forbes jýrnalynyń jahandyq bailar reitingine engen edi (Qazaqstandyq nusqa áli bolmaǵan). Basylym onyń bailyǵyn 2,2 milliard dollar dep baǵalady.
Sunninghill Park, London. Benefitsiar: Timýr Qulybaev / Unity Assets Corporation S.à.r.l. (Liýksembýrg)
2007 jyly Timýr Qulybaev Ulybritaniia patshaiymy Elizaveta II-niń uly, Iork gertsogy hanzada Endriýden Sunninghill Park jer ieligin satyp aldy. Bul múlikke 655 akr aýmaq pen saiabaq aimaǵy kiredi. Múlik 15 million fýnt sterlingke (shamamen 24 million dollar) satyp alynǵan. The Sunday Times basylymynyń habarlaýynsha, satyp alýshy bastapqy baǵaǵa qaraǵanda 3 million fýnt sterling artyq tólegen. Eski sarai buzylyp, onyń ornyna tennis korttary, bassein, jattyǵý zaldary bar jańa úi salynǵan.
Clarendon House, London. Benefitsiarlar: Timýr Qulybaev jáne Dinara Qulybaeva / Kaz Cam Centre Ltd. (Ulybritaniia)
Bul taýnhaýs Kembridj ýniversitetiniń tarihi Botanikalyq baǵbaqtarynyń janynda ornalasqan. 2010 jyly ony britandyq Kaz Cam Centre Ltd. kompaniiasy satyp alǵan. Bul kompaniia – Qazaqstandaǵy kommertsiialyq jyljymaityn múlik salasyndaǵy eń iri investitsiialyq holdingterdiń biri Mercury Properties LLP-tiń enshiles uiymy.
Satyp alý baǵasy: 3,6 million dollar. CaspianCabals portalynyń Kembridj qalalyq keńesine silteme jasap jazýynsha, úidiń bir bóligi shetelden kelgen ǵalymdar men zertteýshilerge ýaqytsha turýǵa berilgen.
