جاقىندا حالىقارالىق زەرتتەۋشى جۋرناليستەر كونسورسيۋمى (ICIJ) تيمۋر جانە دينارا قۇلىبايەۆتاردىڭ ەۋروپاداعى جىلجىمايتىن مۇلكىنە ارنالعان كارتاسىن جاريالادى، دەپ حابارلايدى Dalanews.kz جۋرناليست دميتريي شيشكيننىڭ زەرتتەۋىنە سىلتەپ.
ماسەلەن، لوندوننىڭ بەيكەر-ستريتىندەگى پاتەرلەرگە يەلىك ەتكەن داريعا نازاربايەۆا تۋرالى ايتار بولساق. ب ا ق مالىمەتىنشە، ول نەگىزگى اكتيۆتەرىن ساتقانىمەن، كەيبىر مۇلىكتەرى ءالى دە وزىندە. نازاربايەۆتار ەۋروپاداعى جانە باسقا دا شەتەلدەگى جىلجىمايتىن مۇلىكتەردى كوپتەگەن وففشورلىق كومپانيالار ارقىلى يەلەنگەن.
ۇلىبريتانيا: The Bishops Avenue، لوندون. بەنەفيسيار: نۇرالي الييەۆ
بيشوپ-اۆەنيۋدەگى ۇيگە داريعا نازاربايەۆانىڭ ۇلى نۇرالي الييەۆ كاريب تەڭىزىندە تىركەلگەن Manrick Private Foundation قورى ارقىلى يەلىك ەتەدى. بريتانيالىق رەەستر دەرەكتەرىنە سايكەس، 2014 جىلعى باعالاۋ بويىنشا بۇل جىلجىمايتىن مۇلىكتىڭ قۇنى 1 ميلليون فۋنت ستەرلينگتەن اسادى.
32، Denewood Rd، Highgate. بەنەفيسيارلار: داريعا نازاربايەۆا، ەندريۋ دجون بەيكەر
بۇل سارايعا ليحتەنشتەيندە تىركەلگەن Villa Magna Foundation قورى يەلىك ەتەدى. بريتانيا رەەسترلەرىنىڭ مالىمەتىنشە، بەنەفيسيارلار رەتىندە داريعا نازاربايەۆا مەن ەندريۋ دجون بەيكەر كورسەتىلگەن. باعالاۋ قۇنى – 9،3 ميلليون فۋنت ستەرلينگ.
مەيفەر اۋدانى، لوندون. بەنەفيسيار: تيمۋر قۇلىبايەۆ / Vitala Investment Holding S.à.r.I. (ليۋكسەمبۋرگ) جانە Lynn Properties S.à.r.I. (ليۋكسەمبۋرگ).
2007 جىلى تيمۋر قۇلىبايەۆ باقىلايتىن بەس كومپانيا ۇلىبريتانيادان جالپى قۇنى 184 ميلليون اقش دوللارىنا التى جىلجىمايتىن مۇلىك ساتىپ الدى. سول التى مۇلىكتىڭ ۇشەۋى لوندوننىڭ ەڭ قىمبات اۋدانى سانالاتىن مەيفەردە ورنالاسقان.
ەڭ قىمبات ءتورت قاباتتى گەورگيان ستيلىندەگى تاۋنحاۋس 41 Upper Grosvenor St. مەكەنجايىندا ورنالاسقان. ول 2024 جىلدىڭ ناۋرىزىندا 44 ميلليون دوللارعا ساتىلعان.
وسى مەكەنجايعا جاقىن 42 Upper Grosvenor St. عيماراتىندا قۇلىبايەۆتىڭ يەلىگىندەگى ءتورت قاباتتى نەوكلاسسيكالىق عيمارات بار (Vitala Investment Holding S.à.r.I كومپانياسى ارقىلى ساتىپ الىنعان). ليۋكسەمبۋرگ كومپانياسىنىڭ 2022 جىلعى سوڭعى قارجىلىق ەسەبىنە سايكەس، بۇل مۇلىكتىڭ قۇنى شامامەن 22 ميلليون دوللار.
سول كۆارتالدىڭ قاراما-قارسى جاعىندا قۇلىبايەۆ باقىلايتىن تاعى ءبىر ليۋكسەمبۋرگتىك Lynn Properties S.à.r.I كومپانياسىنا تيەسىلى ەكى قاباتتى ءۇي 42 Reeves Mews مەكەنجايىندا ورنالاسقان. 2022 جىلعى قارجى ەسەبىندە ونىڭ قۇنى 18 ميلليون دوللار دەپ كورسەتىلگەن.
ICIJ مالىمەتتەرى بويىنشا، 2007 جىلى قۇلىبايەۆ لوندوننىڭ كەنسينگتون اۋدانىنداعى «ميلليونەرلەر كوشەسى» اتالىپ كەتكەن جەردە تاعى ەكى جىلجىمايتىن مۇلىك ساتىپ العان. جالپى قۇنى – 54،5 ميلليون دوللار. بۇل اكتيۆتەر كايمان ارالدارىندا تىركەلگەن APH Property Trust Ltd. كومپانياسى ارقىلى باسقارىلعان. قۇلىبايەۆ «تراستتىڭ قۇرىلتايشىسى» رەتىندە كورسەتىلگەن. ايتا كەتۋ كەرەك، سول جىلى قازاقستاننىڭ بۇرىنعى پرەزيدەنتىنىڭ كۇيەۋ بالاسى Forbes جۋرنالىنىڭ جاھاندىق بايلار رەيتينگىنە ەنگەن ەدى (قازاقستاندىق نۇسقا ءالى بولماعان). باسىلىم ونىڭ بايلىعىن 2،2 ميلليارد دوللار دەپ باعالادى.
Sunninghill Park، لوندون. بەنەفيسيار: تيمۋر قۇلىبايەۆ / Unity Assets Corporation S.à.r.l. (ليۋكسەمبۋرگ)
2007 جىلى تيمۋر قۇلىبايەۆ ۇلىبريتانيا پاتشايىمى ەليزاۆەتا IIء-نىڭ ۇلى، يورك گەرسوگى حانزادا ەندريۋدەن Sunninghill Park جەر يەلىگىن ساتىپ الدى. بۇل مۇلىككە 655 اكر اۋماق پەن ساياباق ايماعى كىرەدى. مۇلىك 15 ميلليون فۋنت ستەرلينگكە (شامامەن 24 ميلليون دوللار) ساتىپ الىنعان. The Sunday Times باسىلىمىنىڭ حابارلاۋىنشا، ساتىپ الۋشى باستاپقى باعاعا قاراعاندا 3 ميلليون فۋنت ستەرلينگ ارتىق تولەگەن. ەسكى ساراي بۇزىلىپ، ونىڭ ورنىنا تەننيس كورتتارى، باسسەين، جاتتىعۋ زالدارى بار جاڭا ءۇي سالىنعان.
Clarendon House، لوندون. بەنەفيسيارلار: تيمۋر قۇلىبايەۆ جانە دينارا قۇلىبايەۆا / Kaz Cam Centre Ltd. (ۇلىبريتانيا)
بۇل تاۋنحاۋس كەمبريدج ۋنيۆەرسيتەتىنىڭ تاريحي بوتانيكالىق باعباقتارىنىڭ جانىندا ورنالاسقان. 2010 جىلى ونى بريتاندىق Kaz Cam Centre Ltd. كومپانياسى ساتىپ العان. بۇل كومپانيا – قازاقستانداعى كوممەرسيالىق جىلجىمايتىن مۇلىك سالاسىنداعى ەڭ ءىرى ينۆەستيسيالىق حولدينگتەردىڭ ءبىرى Mercury Properties LLPء-تىڭ ەنشىلەس ۇيىمى.
ساتىپ الۋ باعاسى: 3،6 ميلليون دوللار. CaspianCabals پورتالىنىڭ كەمبريدج قالالىق كەڭەسىنە سىلتەمە جاساپ جازۋىنشا، ءۇيدىڭ ءبىر بولىگى شەتەلدەن كەلگەن عالىمدار مەن زەرتتەۋشىلەرگە ۋاقىتشا تۇرۋعا بەرىلگەن.
