Nuráli Álıev "Transtelekom" AQ dırektorlar keńesi tóraǵasy retindegi ókilettigin toqtatty, - dep habarlaıdy Dalanews.kz.
Bul týraly Nuráli Álıev Instagram-da málimdedi. Onyń aıtýynsha, aksıonerler quramynan shyǵyp, kompanıa satylýyna baılanysty dırektorlar keńesi tóraǵasy retindegi ókilettigin toqtatý týraly sheshim qabyldaǵan.
"Transtelekom" - qazaqstandyq iri baılanys operatorlarynyń biri, telekomýnıkasıa jáne IT-qyzmettermen aınalysady. Forbes málimetteri boıynsha Unit Telecom arqyly kompanıa aksıalarynyń 75 paıyzyna ıelik etýshiler - Nuráli Álıev pen Dmıtrıı Pokýpatelev. Qalǵan 25 paıyzy "Qazaqstan temir jolynda". Buryn kompanıa memleketke tıesili boldy. 2015 jyly "Transtelekom" 9 mıllıard teńgege jekeshelendirilgeni habarlandy.
2022 jylǵy sáýirde Úkimetke "Transtelekomdy" satý jónindegi mámile saldarynan memleketke keltirilgen zalal máselesin zertteý usynyldy.
Buǵan deıin tanymal brıtan jýrnalısi Joanna Lıllıs “Qara kóleńke” deıtin eńbeginde qandy Qańtarǵa deıin "Nuráli atasy men anasynyń qalqasynan (opekasynan) shyǵyp, áýlettiń saıası domınasıasyn uzartý mısıasyn óz moınyna alýǵa tas-túıin daıyn otyrǵanyn" jazǵan bolatyn.
KNB-nyń eks-tóraǵasy Amangeldi Shabdarbaev ta osy málimetti rastap, "Darıǵa bılikti basyp alýdy kózdedi" degen pikir bildirgen.
Dalainside telegram arnasyna belgili bolǵandaı, “shetel asqan aktıvti qaıtarý týraly” zań kúshine engeli Álıevtyń PR qyzmeti men shetel lobbısteri Nuráliniń unamdy beınesin qalyptastyrýǵa shuǵyl kirisken.
Máselen byltyr: “Nazarbaevtyń nemeresi jabaıy tabıǵattyń janashyry. Qar barysynyń qamqorshysy, túz taǵysyn saqtap qalýǵa ólsheýsiz úles qosqan adam...” degen baǵytty kontent kúrt kóbeıgen edi.
Bizdińshe, munyń astarynda saıası jáne qarjylyq strategıa jatyr. Áltýrıstiń obrazyn somdaıtyn Nuráli osy arqyly sheteldegi aktıvin zańdastyra alady ári salyqtyq jeńildikterge ıe bolady.
Álıevtiń qazirgi turǵylyqty mekeni Arab Ámirlikteri dep tuspaldaımyz. Astana ákiminiń orynbasary bolǵan tusta (2014-2016 j) Nuráli sheteldik ınvestısıaǵa jaýap bergen. Sol jyldary Abý-Dabıdyń sheıhi Ál-Naqaıanmen jıi júzdesken Álıev óziniń Capital Holding kompanıasy arqyly Emırattaǵy jyljymaıtyn múlikke ınvestısıany úıip-tókti deýge negiz bar. Capital Holding bertinge deıin dańqty boksshy Gennadıı Golovkınge demeýshi bolǵanyn bilemiz.
