Qazaqstan Respýblikasy Prezidentiniń 2000 jylǵy 31 shildedegi №427 “Memlekettik apparat jumysynyń tiimdiligin arttyrý, biýrokratizmge qarsy kúres jáne qujat ainalymyn qysqartý sharalary týraly” Jarlyǵyna ózgerister engizildi, dep habarlaidy Dalanews.kz.
“Qazaqstan Respýblikasy Prezidentiniń 2000 jylǵy 31 shildedegi №427 «Memlekettik apparat jumysynyń tiimdiligin arttyrý, biýrokratizmge qarsy kúres jáne qujat ainalymyn qysqartý sharalary týraly” Jarlyǵyna:
1-1-tarmaq mynadai ekinshi jáne úshinshi bóliktermen tolyqtyrylsyn:
“Shtattyq san limitin arttyrý memlekettik organdar arasynda bos turǵan shtattyq birlikterdi Qazaqstan Respýblikasy Úkimeti aiqyndaityn tártippen qaita bólý arqyly júzege asyrylady, myna jaǵdailardy qospaǵanda:
• Qazaqstan Respýblikasy Prezidenti engizetin tótenshe jaǵdaiǵa den qoiý qajettiligi;
• ortalyq memlekettik organdardy nemese olardyń vedomstvolaryn qurý;
• Qazaqstan Respýblikasynyń “Qazaqstan Respýblikasynyń ákimshilik-aýmaqtyq qurylysy týraly” Zańyna sáikes ákimshilik-aýmaqtyq qurylymdy ózgertý;
• ózge jaǵdailarda – Qazaqstan Respýblikasy Prezidentiniń tapsyrmasy boiynsha”, - delingen Qazaqstan Respýblikasynyń Prezidenti Qasym-Jomart Toqaevtyń Jarlyǵynda.
Sondai-aq Jarlyqta mynadai tarmaq kórsetilgen:
“Qazaqstan Respýblikasy Prezidenti Ákimshiliginiń, Qazaqstan Respýblikasy Úkimeti apparatynyń, Qazaqstan Respýblikasy Parlamenti palatalary apparattarynyń, Qazaqstan Respýblikasy Sot ákimshiliginiń, quqyq qorǵaý jáne arnaiy memlekettik organdardyń, azamattyq qorǵaý organdarynyń, Qazaqstan Respýblikasy Qorǵanys ministrliginiń, sondai-aq shtat sany 100 birlikten aspaityn memlekettik organdardyń bos turǵan shtattyq birlikteri memlekettik organdar arasynda qaita bólinýge jatpaidy”.
Memleket basshysynyń Jarlyǵy 21 qarashada qol qoiylǵan kúninen bastap kúshine endi.
Eske salaiyq, Memleket basshysy Qasym-Jomart Toqaev sonymen qatar memlekettik apparat jumysyn jetildirý sharalary týraly jarlyqtaryna ózgerister engizgen bolatyn.
Budan bylai Qazaqstan Respýblikasy Prezidentiniń nemese Prezident Ákimshiligi basshylyǵynyń tapsyrmalaryn oryndamaǵan saiasi memlekettik qyzmetshige tártiptik jaza qoldanylady.
2000 jylǵy Prezident jarlyǵyna sáikes, tártiptik jaza kelesi jaǵdailarda qarastyrylǵan:
- qyzmetshilerdiń ózderine júktelgen mindetterin zańsyz nemese durys oryndamaýy;
- laýazymdyq ókilettikterin asyra paidalanýy;
- memlekettik jáne eńbek tártibin buzýy;
- memlekettik qyzmetshilerdiń qyzmettik etika erejelerin buzýy;
- tártiptik jaza túrinde jazalanatyn sybailas jemqorlyq quqyqbuzýshylyq jasaýy;
- memlekettik qyzmet týraly zańda kórsetilgen shekteýlerdi nemese memlekettik qyzmetshilerdiń mindetterin oryndamaýy.
Budan bólek, qujatqa sáikes, ortalyq jáne jergilikti memlekettik organdarǵa memlekettik biýdjetten qarjylandyrylatyn uiymdardyń kadrlyq protsesterin “Biryńǵai kadrlyq júie” aqparattyq júiesi negizinde avtomattandyrýdy 2025 jyldyń 31 jeltoqsanyna deiin qamtamasyz etý tapsyryldy.
