QR Parlament Májilisindegi "nurotandyq" depýtattar búkil elde tastandy balalarǵa arnalǵan qoraptar ornatýdy usynyp otyr. Mundai bastamany jýyrda ǵana Astananyń ataýyn "Elbasy" dep ózgertkisi kelgen depýtat Baqytgúl Hamenova Premer-ministrge joldaǵan saýalynda kótergen.
Bul týraly sn.kz jazady.
«Buryn qazaqtyń analary balalaryn bulai kóshege tastamaǵan, bul bizdiń mentalitet úshin jat. Ókinishke qarai, qazir mundai oqiǵalar kóbeiip ketti, sábilerdi qoqys jáshikterinen jáne qoǵamdyq oryndardan taýyp alyp atyrmyz. Mundai jaittar respýblikanyń barlyq aýmaǵynda kezdesip otyr», - dedi depýtat.
Onyń aitýynsha, biyldyń ózinde balany tastaýdyń 8 deregi tirkelipti.
«Bas prokýratýranyń málimetteri boiynsha, 2016 jyly Qylmystyq kodekstiń 119 baby "balany qaýipti jaǵdailarda qaldyryp ketý" faktisi boiynsha ishki ister organdary 15 is qozǵady. 2017 jyldyń 3 aiynda 8 oqiǵa tirkeldi. Ókinishke qarai, mundai oqiǵalar ósip jatyr. Qyzdar urpaq jalǵastyrýy tiis. Qyzdarymyzdyń tárbie-ónegesi - bolashaq býynnyń taǵdyry», - deidi Hamenova.
Onyń pikirinshe, balalardy qoqys jáshiginde óltirmeý úshin kóshelerge sheteldegidei bebi-bokstar ornatý kerek.
«Keibir elderle "úmit besigi" - bebi-boks degen bar. Áielder isi jáne otbasy-demografiialyq saiasat jónindegi ulttyq komissiia jáne qoǵamdyq uiymdarǵa kúsh biriktiretin ýaqyt jetti. Osyndai "úmit besikteri" kóptegen batys elderinde meditsinalyq mekemelerdiń janynda ornatylady. Osylaisha, myńdaǵan náresteniń ómirine arasha boldy. Atalmysh bokstardy ornatý oryn alǵan jaǵdaidy sheshe alar edi», - dedi ol.
Aita ketsek, budan buryn Parlament palatalarynyń birikken otyrysynda depýtat Hamenova: «Men Elbasyn súiemin. Prezidentpen «kózimdi ashtym». Táýelsiz Qazaqstannyń urpaǵymyn. Nege men prezidentimizge júrekjardy sózimdi aita almaimyn?" degen málimdese jasaǵan jáne Astananyń atyn Nazarbaev dep ózgertýdi usynǵan.
