Qazaqstan Qarjy monitoringi agenttigi tóraǵasynyń orynbasary Jeńis Elemesov eks-prezident Nursultan Nazarbaevtyń týystaryna tiesili bolýy múmkin degen sheteldik múlik jaiynda pikir bildirdi. Bul suraq sheteldik basylymdarda jariialanǵan derekterge bailanysty qoiylǵan edi, dep habarlaidy Dalanews.kz.
Elemesovtiń aitýynsha, shetelde múliktiń nemese aktivtiń bolýy – óz aldyna qylmys emes.
– Sizder ne týraly aityp turǵandaryńyzdy tolyq túsinbedim. Meniń qolymda ondai aqparat joq. Sheteldegi aktivtiń ózi – qylmys emes, muny durys túsiný qajet. Eger sizderde naqty málimet bolsa – mysaly, bul aktiv qylmystyq jolmen alynǵan, biýdjetten urlanǵan aqshaǵa satyp alynǵan degen siiaqty – sol derekterdi berińizder, – dedi agenttik ókili.
Ol eger agenttik qandai da bir qylmystyq áreket belgilerin anyqtasa, zańǵa sáikes tergeý bastalatynyn jetkizdi.
– Shetelde bireýdiń aktivi bar eken degen jalpylama sózderge ǵana súienip, tekseris júrgizý durys emes, – dedi Elemesov.
Eske salaiyq, Nursultan Nazarbaev 2019 jyly tikelei efirde prezidenttik ókilettigin toqtatatynyn málimdegen bolatyn. Ol Qazaqstandy 30 jyl boiy basqardy, al 2022 jyly saiasattan tolyqtai ketkenin jariialady.
Sońǵy jyldary sheteldik BAQ-ta Nazarbaevtyń otbasyna tiesili delingen qymbat úiler men aktivter týraly materialdar jii jariialanyp keledi. Alaida Qazaqstannyń resmi organdary mundai múlikterge qatysty tekserýdi naqty dálel bolǵan jaǵdaida ǵana júrgizýge daiyn ekenin aitady.
