Buǵan deiin Memleket basshysy Ulttyq quryltaidyń quramy men erejesin bekitken bolatyn. Jańa qoǵamdyq institýttyń quramyna elge tanymal azamattar kirdi.
Ulttyq quryltaiǵa barlyǵy 117 adam múshe boldy.
“Jańa qoǵamdyq institýttyń quramyna belgili kompozitor, jazýshy, Qazaqstannyń Eńbek Eri Ilia Jaqanov, ataqty aqyn, diplomat jáne qoǵam qairatkeri Muhtar Shahanov, qazaqtan shyqqan tuńǵysh ǵaryshker, Keńes Odaǵynyń batyry, Halyq Qaharmany Toqtar Áýbákirov, belgili jýrnalist jáne qoǵam qairatkeri Seidahmet Quttyqadam, ataqty matematik ǵalym, akademik Asqar Jumadildaev, myqty ekonomist jáne qoǵam qairatkeri Jaqsybek Kúlekeev, kórnekti memleket jáne saiasi qairatker Álihan Baimenov, jýrnalist, media-menedjer, qoǵam qairatkeri Ermurat Bapi, memleket jáne qoǵam qairatkeri, Parlamenttiń birneshe shaqyrylymynda depýtat bolǵan Nurtai Sabilianov memleket qairatkeri, Álem chempiony, Seýl Olimpiadasynyń kúmis júldegeri Dáýlet Turlyhanov biotehnolog ǵalym, COVID-19 indetine qarsy qazaqstandyq "QazVac" vaktsinasyn daiyndaǵan Kúnsulý Zakaria, qoǵam qairatkeri, dintanýshy Qairat Joldybaiuly, belgili lingvist ǵalym Anar Fazyljanov, ekolog, qoǵam belsendisi Azamat Ámirtaev jáne taǵy da basqa Qazaqstanǵa keńinen tanymal azamattar kirdi. Ulttyq quryltaiǵa barlyǵy 117 adam múshe boldy”, – dedi óz kezeginde Erlan Qarin.
Ulttyq quryltaidyń negizgi ereksheligi – uiymnyń quramyna ár óńirdegi qoǵamdyq keńesterdiń bir múshesi endi. Osylaisha, atalǵan dialog alańy barlyq qoǵamdyq keńesterdiń túiini ispetti bolyp otyr.
“Sonymen qatar Ulttyq quryltaiǵa Parlament depýtattary, saiasi partiialardyń, biznestiń iri salalyq birlestikteriniń, meditsina, bilim, ǵylym, mádeniet, sport, adam quqyqtaryn qorǵaý jáne basqa da áleýmettik toptardyń ókilderi múshe boldy. Sondai-aq jastardyń kóshbasshylary men belsendi jas azamattar da shaqyryldy”, – dedi Erlan Qarin.
Ulttyq qoǵamdyq senim keńesi óz jumysyn aiaqtady. Al onyń quramynyń negizgi bóligi Ulttyq quryltaiǵa kirdi.
Aita keteiik, Prezident jańa qurylymnyń qurylatyny jaiynda eń birinshi ret naýryzdaǵy Joldaýynda aitqan bolatyn.
“Ulttyq quryltai ne úshin quryldy? Ulttyq quryltai qoǵamdy uiystyrý jolynda ideialar usyný jáne ony júzege asyrýǵa qatysty dialog alańy bolmaq.
Ulttyq quryltaidyń Ulttyq qoǵamdyq senim keńesinen aiyrmashylyǵy qandai?
Buryn Ulttyq qoǵamdyq senim keńesinde áleýmettik-ekonomikalyq problemalar men saiasi reformalar jaiynda aitylsa, endi Ulttyq quryltaida jalpyulttyq qundylyqtardy nyǵaita otyryp, qoǵamdy odan ári uiystyrýǵa baǵyttalǵan uzaqmerzimdi máseleler talqylanady.
Ulttyq quryltaidyń quramy qalai jasaqtalady?
Ulttyq quryltai – Prezident janyndaǵy konsýltativtik-keńesshi organ. Soǵan sáikes, onyń quramy jónindegi usynystardy Memleket basshysynyń Ákimshiligi daiyndaidy. Ulttyq quryltaidyń otyrystaryna tek Ulttyq quryltaidyń músheleri ǵana qatysa alady.
Ulttyq quryltaidyń jumysy qoǵamdyq negizde atqarylatynyn atap ótý kerek. Sonymen qatar, Quryltai múshelerin rotatsiialaý printsipi qarastyrylǵan. Bul aldaǵy ýaqytta kezeń-kezeńimen basqa da qoǵam belsendilerin Ulttyq quryltai jumysyna qatystyrýǵa múmkindik beredi.
Barsha qazaqstandyqtar Ulttyq quryltaidyń hatshylyǵyna óz usynystaryn joldai alatyn arnaiy onlain-platforma qurylǵanyn airyqsha atap aitqym keledi.
Osylaisha, Ulttyq quryltai jańarǵan Qazaqstandy qurýǵa óz úlesin qosqysy keletin azamattardyń jalpyulttyq uiysýyna ózek bolady”, – dedi Memlekettik keńesshi.
