بۇعان دەيىن مەملەكەت باسشىسى ۇلتتىق قۇرىلتايدىڭ قۇرامى مەن ەرەجەسىن بەكىتكەن بولاتىن. جاڭا قوعامدىق ينستيتۋتتىڭ قۇرامىنا ەلگە تانىمال ازاماتتار كىردى.
ۇلتتىق قۇرىلتايعا بارلىعى 117 ادام مۇشە بولدى.
“جاڭا قوعامدىق ينستيتۋتتىڭ قۇرامىنا بەلگىلى كومپوزيتور، جازۋشى، قازاقستاننىڭ ەڭبەك ەرى يليا جاقانوۆ، اتاقتى اقىن، ديپلومات جانە قوعام قايراتكەرى مۇحتار شاحانوۆ، قازاقتان شىققان تۇڭعىش عارىشكەر، كەڭەس وداعىنىڭ باتىرى، حالىق قاھارمانى توقتار اۋباكىروۆ، بەلگىلى جۋرناليست جانە قوعام قايراتكەرى سەيداحمەت قۇتتىقادام، اتاقتى ماتەماتيك عالىم، اكادەميك اسقار جۇمادىلدايەۆ، مىقتى ەكونوميست جانە قوعام قايراتكەرى جاقسىبەك كۇلەكەيەۆ، كورنەكتى مەملەكەت جانە ساياسي قايراتكەر ءاليحان بايمەنوۆ، جۋرناليست، مەديا-مەنەدجەر، قوعام قايراتكەرى ەرمۇرات باپي، مەملەكەت جانە قوعام قايراتكەرى، پارلامەنتتىڭ بىرنەشە شاقىرىلىمىندا دەپۋتات بولعان نۇرتاي سابيليانوۆ مەملەكەت قايراتكەرى، الەم چەمپيونى، سەۋل وليمپياداسىنىڭ كۇمىس جۇلدەگەرى داۋلەت تۇرلىحانوۆ بيوتەحنولوگ عالىم، COVID-19 ىندەتىنە قارسى قازاقستاندىق "QazVac" ۆاكسيناسىن دايىنداعان كۇنسۇلۋ زاكاريا، قوعام قايراتكەرى، ءدىنتانۋشى قايرات جولدىباي ۇلى، بەلگىلى لينگۆيست عالىم انار فازىلجانوۆ، ەكولوگ، قوعام بەلسەندىسى ازامات امىرتايەۆ جانە تاعى دا باسقا قازاقستانعا كەڭىنەن تانىمال ازاماتتار كىردى. ۇلتتىق قۇرىلتايعا بارلىعى 117 ادام مۇشە بولدى”، – دەدى ءوز كەزەگىندە ەرلان قارين.
ۇلتتىق قۇرىلتايدىڭ نەگىزگى ەرەكشەلىگى – ۇيىمنىڭ قۇرامىنا ءار وڭىردەگى قوعامدىق كەڭەستەردىڭ ءبىر مۇشەسى ەندى. وسىلايشا، اتالعان ديالوگ الاڭى بارلىق قوعامدىق كەڭەستەردىڭ ءتۇيىنى ىسپەتتى بولىپ وتىر.
“سونىمەن قاتار ۇلتتىق قۇرىلتايعا پارلامەنت دەپۋتاتتارى، ساياسي پارتيالاردىڭ، بيزنەستىڭ ءىرى سالالىق بىرلەستىكتەرىنىڭ، مەديسينا، ءبىلىم، عىلىم، مادەنيەت، سپورت، ادام قۇقىقتارىن قورعاۋ جانە باسقا دا الەۋمەتتىك توپتاردىڭ وكىلدەرى مۇشە بولدى. سونداي-اق جاستاردىڭ كوشباسشىلارى مەن بەلسەندى جاس ازاماتتار دا شاقىرىلدى”، – دەدى ەرلان قارين.
ۇلتتىق قوعامدىق سەنىم كەڭەسى ءوز جۇمىسىن اياقتادى. ال ونىڭ قۇرامىنىڭ نەگىزگى بولىگى ۇلتتىق قۇرىلتايعا كىردى.
ايتا كەتەيىك، پرەزيدەنت جاڭا قۇرىلىمنىڭ قۇرىلاتىنى جايىندا ەڭ ءبىرىنشى رەت ناۋرىزداعى جولداۋىندا ايتقان بولاتىن.
“ۇلتتىق قۇرىلتاي نە ءۇشىن قۇرىلدى؟ ۇلتتىق قۇرىلتاي قوعامدى ۇيىستىرۋ جولىندا يدەيالار ۇسىنۋ جانە ونى جۇزەگە اسىرۋعا قاتىستى ديالوگ الاڭى بولماق.
ۇلتتىق قۇرىلتايدىڭ ۇلتتىق قوعامدىق سەنىم كەڭەسىنەن ايىرماشىلىعى قانداي؟
بۇرىن ۇلتتىق قوعامدىق سەنىم كەڭەسىندە الەۋمەتتىك-ەكونوميكالىق پروبلەمالار مەن ساياسي رەفورمالار جايىندا ايتىلسا، ەندى ۇلتتىق قۇرىلتايدا جالپىۇلتتىق قۇندىلىقتاردى نىعايتا وتىرىپ، قوعامدى ودان ءارى ۇيىستىرۋعا باعىتتالعان ۇزاقمەرزىمدى ماسەلەلەر تالقىلانادى.
ۇلتتىق قۇرىلتايدىڭ قۇرامى قالاي جاساقتالادى؟
ۇلتتىق قۇرىلتاي – پرەزيدەنت جانىنداعى كونسۋلتاتيۆتىك-كەڭەسشى ورگان. سوعان سايكەس، ونىڭ قۇرامى جونىندەگى ۇسىنىستاردى مەملەكەت باسشىسىنىڭ اكىمشىلىگى دايىندايدى. ۇلتتىق قۇرىلتايدىڭ وتىرىستارىنا تەك ۇلتتىق قۇرىلتايدىڭ مۇشەلەرى عانا قاتىسا الادى.
ۇلتتىق قۇرىلتايدىڭ جۇمىسى قوعامدىق نەگىزدە اتقارىلاتىنىن اتاپ ءوتۋ كەرەك. سونىمەن قاتار، قۇرىلتاي مۇشەلەرىن روتاسيالاۋ ءپرينسيپى قاراستىرىلعان. بۇل الداعى ۋاقىتتا كەزەڭ-كەزەڭىمەن باسقا دا قوعام بەلسەندىلەرىن ۇلتتىق قۇرىلتاي جۇمىسىنا قاتىستىرۋعا مۇمكىندىك بەرەدى.
بارشا قازاقستاندىقتار ۇلتتىق قۇرىلتايدىڭ حاتشىلىعىنا ءوز ۇسىنىستارىن جولداي الاتىن ارنايى ونلاين-پلاتفورما قۇرىلعانىن ايرىقشا اتاپ ايتقىم كەلەدى.
وسىلايشا، ۇلتتىق قۇرىلتاي جاڭارعان قازاقستاندى قۇرۋعا ءوز ۇلەسىن قوسقىسى كەلەتىن ازاماتتاردىڭ جالپىۇلتتىق ۇيىسۋىنا وزەك بولادى”، – دەدى مەملەكەتتىك كەڭەسشى.
