Qurmetti Prezident myrza!
Ardaqty Nursultan Ábishuly!
Sizge osy hatty jazýymnyń mánisin túsinip otyrǵan bolarsyz, mazańyzdy alsam - ǵafý etersiz... Ózińiz habardar shyǵarsyz, men bir yńǵaisyz jaǵdaiǵa tap bolyp otyrmyn. Men prodiýsserlik etetin "Feniks" filmin túsirýge daiyndyqtar kezinde, ony uiymdastyrýshylar tarapynan bólingen qarjynyń ysyrap bolyp jatqany jaily tergeý isi júrip jatyr. "Negizsiz jumsaldy" degen qarjyǵa meniń qatysym bolmasa da, isti ýshyqtyrmaiyn dep, týystarym men shákirtterim aqsha jinap, kórsetilgen 5 mln. aqshany qaitardyq. Osy ýaqiǵadan keiin, saryýaiymǵa salynyp, shuǵyl emhanaǵa tústim. Sodan beri syrqatym údep barady.
Bilesiz, men qarjyger emespin, bólingen qarjyny ornymen jumsaýǵa tiisti adamdar, oǵan tikelei jaýap beretin oryndaýshy prodiýsser bar. Meniki jalpy basshylyq, aqsha jaǵyna aralasqan emespin, ondai birde-bir qujattarda, jasalǵan kelisim-sharttarda meniń qolym joq. Basty armanym - elimizdiń imidjin odan ary kóteretin fentezi janryndaǵy kórkem film jasaýǵa qatysyp, basty roliniń birin oryndaý ǵana edi...
Endi, meniń sol "sengen" adamdarym bárin maǵan jaýyp, ózderin aqtap almaqshy bop jatyr. Meniń ol aqshanyń retsiz jumsalýyna eshqandai qatysym bolmasa da, isti tergeýshilerdiń tegeýrinine túsken qarjyǵa jaýapty áiel adamdardy aiap, bir jaǵy quryltaishysy ózim kompaniianyń abyroiyn jabý úshin jasaǵan adal áreketime qaraityn túrleri joq. Meniń kinám - tóńiregimdegi adamdarǵa qulai senip, salaqtyq jasap, jii tekseris jasamaǵanym bolyp otyr. Degenmen, qansha teksersem de, men kino túsirýdiń qarjylyq qupiialaryn túsinbeitin de edim. Aldynda bolǵan birdi-ekili aýdit, t.b. tekserýlerden taza shyqqandai edi...
Qymbatty Nursultan Ábishuly!
Áýeli, ǵasyrlar boiy ata-babalarymyzdyń arman etken Táýelsizdiktiń týyn tigip, irgesin qalap, Uly Dalany ymyramen Máńgilik Elge bastaǵan Ózińizden, osy keleńsiz jaǵdaiǵa dýshar bolǵanym úshin, meni syilap qadirleitin, búgingi jaǵdaiyma kúizelip júrgen búkil kórermen halqym men áriptesterimnen keshirim suraimyn. Meniń Sizden basqa senerim de, súienerim de joq. Ańǵaldyqpen uiatty bolǵan bir inińizge shapaǵatyńyzdy tigizer me ekensiz... Jetpiske taianǵan jasymda taǵdyrdyń mundai taýqymetine tap bolǵanyma qatty kúiinýdemin...
Ózińizge degen qurmeti sheksiz baýyryńyz -
Tuńǵyshbai Jamanqulov
Derekkóz: Abai.kz
