Eks-prezident Nursultan Nazarbaevtyń qyzy Áliia Nazarbaevaǵa qatysty qylmystyq is Almatynyń Ekonomikalyq tergeý departamentine berildi. Osylaisha, prokýratýra politsiianyń eks-prezidenttiń kishi qyzyna qarsy sotqa deiingi tergeý júrgizýden bas tartý týraly sheshiminiń kúshin joidy. Bul týraly «TPK Aziia» JShS quryltaishylarynyń biri Nurlan Bimýrzin aitty, - dep habarlaidy Dalanews.kz KazTag-qa siltep.
«Seń qozǵala bastady. Ol kezde kompaniia quramynda Medgad Kaliev, marqum ákem Serik Bimýrzin jáne men boldym. Bizdiń kompaniiamyz «Alem LTD» JShS-ne qarjy aýdarǵan. Iaǵni aqshanyń bir bóligi Luxor kesheni (Wellness Club Luxor fitnes-ortalyǵy) salynǵan», - deidi Bimýrzin.
Onyń sózinshe, endi olar Luxor qyzmetine shekteý qoiýdy talap etpek. Sonymen qatar, Nurlan Bimýrzinniń sózinshe, Valentina Rogova (Áliia Nazarbaevamen birge reiderlik shabýyl jasaǵan adam) tarapynan qoqan-loqylar túse bastaǵan.
«25 naýryz – meniń týǵan kúnimnen beri Medgad Kaliev ekeýimizge qoqan-loqy kórsetip, internet-qońyraýlar túsip júr. El aldyna shyǵyp, sóileýimizdi doǵarýdy talap etedi. 18 sáýirde maǵan jáne Kalievke Erzaq esimdi astanalyq politsei habarlasyp, suraqtarǵa jaýap berýimizdi surady. Biz eki ai buryn Áliia Nazarbaeva tarapynan jasalǵan reiderlik týraly aryz jazsaq ta ony suraqtarǵa jaýap berýge shaqyrmaǵan. Iaǵni Áliia Nazarbaeva advokaty arqyly aryz jazyp, bizdi politsiia bólimine shaqyrtqan. Jala jabylǵan deidi. Birinshiden, shyndyq bizdiń jaqta bolsa, ne úshin úndemei qalýymyz kerek? Ekinshiden, bizde barlyq dálel bolsa, qaidaǵy jala?», - deidi Bimýrzin.
Aita keteiik, buǵan deiin 5 sáýirde politsiia eks-prezident Nursultan Nazarbaevtyń qyzy Áliia Nazarbaevaǵa, sondai-aq Konstitýtsiialyq keńestiń burynǵy tóraǵasy Igor Rogovtyń áieli Valentina Rogovaǵa qatysty qylmystyq is qozǵaýdan bas tarttytqan bolatyn. Bul týraly "TPK Aziia" JShS quryltaishysy Nurlan Bimýrzin málim etti. "Osy jyldyń 14 naýryzynda memleket basshysy Toqaev Bas prokýror Asylovpen kásipti bopsalaýshylardan qorǵaý taqyrybynda kezdesý ótkizdi. Al 19 aqpanda Meǵdat Qaliev ekeýimiz Bas prokýratýraǵa aryz jazdyq. Prezidentimizdiń tapsyrmasyna qaramastan, Bas prokýratýra isti QMA-ǵa jiberedi, degenmen QMA-dan maǵan eshkim habarlaspady jáne eshqandai tergeý áreketterin júrgizbedi.
Munyń aldynda, 28 aqpanda baspasóz máslihaty ótip, onda eks prezidenttiń kishi qyzy Áliia Nazarbaeva men zańger Valentina Rogova 2003 jyly reiderlik shabýyl jasap, "TPK Aziia" JShS-in kásipkerden tartyp alǵany belgili boldy. Kompaniia quramynda 7 munai bazasy jáne 96 janarmai beketi bolǵan. Kásiptiń quny 170 million dollar. Zardap shekken kásipkerler Medgat Qaliev men Nurlan Bimýrzin Áliia Nazarbaeva olardyń kásibin qalai tartyp alǵanyn áńgimelep bergen bolatyn.
Kásipker Medgat Qalievtiń sózinshe, ol "TPK Aziia" kompaniiasyn Nurlan Bimýrzinniń ákesimen ashqan. Bastapqyda kásip shaǵyn bolǵanymen, ýaqyt óte kele ulǵaia bastaǵan. 2003 jylǵa qarai kompaniiada 7 munai bazasy men 96 janarmai quiý beketi bolǵan. Osylaisha úsh jyldyń ishinde belgili bir júiemen jumys isteitin kompaniia paida bolǵan.
Biraq kompaniiaǵa 2002 jyldardyń ózinde Áliia Nazarbaevanyń kózi túse bastaǵan.
"Eki jyldai tynbai jumys istegennen keiin kompaniiaǵa kóz túse bastaidy, tanyla bastaidy. Alǵashqy problemalar 2002 jyldary bastaldy. Qarjy politsiiasy shabýyl jasai bastady. Bastapqyda eki janarmai quiý beketinen bastap, keiin 4, sosyn altaýyna kóshti. Iaǵni olar osylaisha bizdi qorqytpaq boldy. Muny aitýǵa bola ma, joq pa bilmeimin, ol kezde bári paramen sheshiletin. Qarjy politsiiasy qalai jumys isteitinin de bilesizder", - deidi Medgat Qaliev ORDA News-ke bergen suhbatynda.
"Bizde basqa aktsioner bolmady. Tek ekeýimiz: men jáne marqum Serik Bimýrzin (kásipker Nurlan Bimýrzinniń ákesi). Serik ekeýimiz otyryp, oilana bastadyq. "Bólisý kerek" degen usynystar túse bastady. Serik tiri bolǵan kezde bárin ózi aitar edi. Sol kezde Serikke osyndai usynystarmen tikelei shyqqandar boldy. Bizge "aqshanyń astynda qaldyńdar" degendei tuspaldaǵandar boldy. Sebebi 6 óńirde júieli jumys istep otyrdyq", - deidi kásipker.
Osylaisha Ábliazovqa tiesili bolǵan "Temir bankte" jumys isteitin adam olarǵa "krysha" bolýdy usynǵan.
"Ol adam bizge "Áýletke, onyń ishinde Áliiamen bailanys ornata alamyn" dedi. Ol adam bizde áldeqandai problema baryn estip, "senderdi tanystyraiyn, sol kezde tynysh jumys istei beresińder" dedi. Osylai Áliia Nazarbaevamen tanystyq", - deidi Medgat Qaliev.
"Krysha" bolýǵa 2002 jyly qarjy politsiiasy kompaniiaǵa tiesili birneshe janarmai quiý beketin jaýyp tastaýy sebep bolǵan kórinedi.
"Bizge áldekimder kelip, "Biz Rahat Álievtiń adamdarymyz, bólisý kerek" dedi. Bizge belgili bir somany kórsetti. Bastapqyda Álievke ózderi aitqan aqshany berdik.
Biraq munymen toqtamaitynyn bildik. Sol kezde "Temir bankte" bankir bolǵan tanysymyz bar edi – Berik Sarin. Ol bizge kelip "Áliia sizdermen kezdeskisi keledi. Senderdiń problemalaryńnan habardar, senderdi qorǵaǵysy keledi" dedi. Bul "qorǵaý" úshin ol kompaniianyń 50 paiyzyn surady", - deidi kásipker Nurlan Baimýrzin.
Osylaisha kásipkerler Rahat Áliev jáne Áliia Nazarbaeva degen eki ottyń ortasynda qalǵan.
"Bizge Berik Sarin "Áliiany tańdamasańdar jaǵdailaryń odan saiyn qiyndaidy" dedi. Áliia ol kezde nebári 21 jasta bolǵan. Ol kezde kásipten eshqandai habary joq, biraq Nazarbaeva degen tegi bar adam ǵana edi. Osylaisha 2002 jyly 4 qyrkúiekte men kompaniianyń 100 paiyz iesi bola tura 50 paiyzyn Áliiaǵa bólip berdim. 25 paiyzyn Nurlanǵa jazyp, 25 paiyzyn ózime qaldyrdym. Áliianyń odan bólek 4 kompaniiasy bolǵan. Valentina Rogova – Áliianyń barlyq kompaniiadaǵy ókili", - deidi kásipker Medgat Qaliev.
Onyń sózinshe, Áliia qujattarǵa qol qoiǵannan keiin jarty jyldai tynyshtyq ornaǵan. Keiinnen Rogova kompaniianyń isine aralasa bastaǵan.
"Tipti qujattarǵa qol qoiǵan kezde Áliianyń "Ustaldy" degenin estip qaldyq. Biraq adam jaǵdaiy bola tura sonshalyq ashkóz bolady dep oilamadym. (...) Bir kúni Áliiamen keńsesinde kezdestik. Ol bizden aman-saýlyq suramai, "Qalǵan 50 paiyz úlesterińiz kerek" dedi. Mundaidy kútpedik, tańǵaldyq. "Áliia, ol bizge de kerek" dedim. "Sizdiń úles maǵan kerek, ony maǵan berý kereksizder" dedi. Olardyń maqsaty kompaniianyń kúl-talqanyn shyǵaryp, satý bolǵan eken. "Sen eń quryǵanda Bimýrzinniń úlesin satyp alsaishy" dedim. Ol kók tiyn da bermeitinin aitty", - deidi Medgat Qaliev.
Onyń sózinshe, kompaniia táýelsiz jumys istegen.
