ەكس-پرەزيدەنت نۇرسۇلتان نازاربايەۆتىڭ قىزى ءاليا نازاربايەۆاعا قاتىستى قىلمىستىق ءىس الماتىنىڭ ەكونوميكالىق تەرگەۋ دەپارتامەنتىنە بەرىلدى. وسىلايشا، پروكۋراتۋرا پوليسيانىڭ ەكس-پرەزيدەنتتىڭ كىشى قىزىنا قارسى سوتقا دەيىنگى تەرگەۋ جۇرگىزۋدەن باس تارتۋ تۋرالى شەشىمىنىڭ كۇشىن جويدى. بۇل تۋرالى «تپك ازيا» ج ش س قۇرىلتايشىلارىنىڭ ءبىرى نۇرلان بيمۋرزين ايتتى، - دەپ حابارلايدى Dalanews.kz KazTag-قا سىلتەپ.

«سەڭ قوزعالا باستادى. ول كەزدە كومپانيا قۇرامىندا مەدگاد كالييەۆ، مارقۇم اكەم سەرىك بيمۋرزين جانە مەن بولدىم. ءبىزدىڭ كومپانيامىز «الەم لتد» جشس-نە قارجى اۋدارعان. ياعني اقشانىڭ ءبىر بولىگى Luxor كەشەنى (Wellness Club Luxor فيتنەس-ورتالىعى) سالىنعان»، - دەيدى بيمۋرزين.

ونىڭ سوزىنشە، ەندى ولار Luxor قىزمەتىنە شەكتەۋ قويۋدى تالاپ ەتپەك. سونىمەن قاتار، نۇرلان ءبيمۋرزيننىڭ سوزىنشە، ۆالەنتينا روگوۆا (ءاليا نازاربايەۆامەن بىرگە رەيدەرلىك شابۋىل جاساعان ادام) تاراپىنان قوقان-لوقىلار تۇسە باستاعان.

«25 ناۋرىز – مەنىڭ تۋعان كۇنىمنەن بەرى مەدگاد كالييەۆ ەكەۋىمىزگە قوقان-لوقى كورسەتىپ، ينتەرنەت-قوڭىراۋلار ءتۇسىپ ءجۇر. ەل الدىنا شىعىپ، سويلەۋىمىزدى دوعارۋدى تالاپ ەتەدى. 18 ساۋىردە ماعان جانە كالييەۆكە ەرزاق ەسىمدى استانالىق پوليسەي حابارلاسىپ، سۇراقتارعا جاۋاپ بەرۋىمىزدى سۇرادى. ءبىز ەكى اي بۇرىن ءاليا نازاربايەۆا تاراپىنان جاسالعان رەيدەرلىك تۋرالى ارىز جازساق تا ونى سۇراقتارعا جاۋاپ بەرۋگە شاقىرماعان. ياعني ءاليا نازاربايەۆا ادۆوكاتى ارقىلى ارىز جازىپ، ءبىزدى پوليسيا بولىمىنە شاقىرتقان. جالا جابىلعان دەيدى. بىرىنشىدەن، شىندىق ءبىزدىڭ جاقتا بولسا، نە ءۇشىن ۇندەمەي قالۋىمىز كەرەك؟ ەكىنشىدەن، بىزدە بارلىق دالەل بولسا، قايداعى جالا؟»، - دەيدى بيمۋرزين.  

ايتا كەتەيىك، بۇعان دەيىن 5 ساۋىردە پوليسيا ەكس-پرەزيدەنت نۇرسۇلتان نازاربايەۆتىڭ قىزى ءاليا نازاربايەۆاعا، سونداي-اق كونستيتۋسيالىق كەڭەستىڭ بۇرىنعى ءتوراعاسى يگور روگوۆتىڭ ايەلى ۆالەنتينا روگوۆاعا قاتىستى قىلمىستىق ءىس قوزعاۋدان باس تارتتىتقان بولاتىن. بۇل تۋرالى "تپك ازيا" ج ش س قۇرىلتايشىسى نۇرلان بيمۋرزين ءمالىم ەتتى. "وسى جىلدىڭ 14 ناۋرىزىندا مەملەكەت باسشىسى توقايەۆ باس پروكۋرور اسىلوۆپەن كاسىپتى بوپسالاۋشىلاردان قورعاۋ تاقىرىبىندا كەزدەسۋ وتكىزدى. ال 19 اقپاندا مەعدات قالييەۆ ەكەۋىمىز باس پروكۋراتۋراعا ارىز جازدىق. پرەزيدەنتىمىزدىڭ تاپسىرماسىنا قاراماستان، باس پروكۋراتۋرا ءىستى قما-عا جىبەرەدى، دەگەنمەن قما-دان ماعان ەشكىم حابارلاسپادى جانە ەشقانداي تەرگەۋ ارەكەتتەرىن جۇرگىزبەدى.

مۇنىڭ الدىندا، 28 اقپاندا باسپا ءسوز ءماسليحاتى ءوتىپ، وندا ەكس پرەزيدەنتتىڭ كىشى قىزى ءاليا نازاربايەۆا مەن زاڭگەر ۆالەنتينا روگوۆا 2003 جىلى رەيدەرلىك شابۋىل جاساپ، "تپك ازيا" ءجشس-ىن كاسىپكەردەن تارتىپ العانى بەلگىلى بولدى. كومپانيا قۇرامىندا 7 مۇناي بازاسى جانە 96 جانارماي بەكەتى بولعان. كاسىپتىڭ قۇنى 170 ميلليون دوللار. زارداپ شەككەن كاسىپكەرلەر مەدگات قالييەۆ مەن نۇرلان بيمۋرزين ءاليا نازاربايەۆا ولاردىڭ كاسىبىن قالاي تارتىپ العانىن اڭگىمەلەپ بەرگەن بولاتىن.

كاسىپكەر مەدگات قالييەۆتىڭ سوزىنشە، ول "تپك ازيا" كومپانياسىن نۇرلان ءبيمۋرزيننىڭ اكەسىمەن اشقان. باستاپقىدا كاسىپ شاعىن بولعانىمەن، ۋاقىت وتە كەلە ۇلعايا باستاعان. 2003 جىلعا قاراي كومپانيادا 7 مۇناي بازاسى مەن 96 جانارماي قۇيۋ بەكەتى بولعان. وسىلايشا ءۇش جىلدىڭ ىشىندە بەلگىلى ءبىر جۇيەمەن جۇمىس ىستەيتىن كومپانيا پايدا بولعان.

ءبىراق كومپانياعا 2002 جىلداردىڭ وزىندە ءاليا نازاربايەۆانىڭ كوزى تۇسە باستاعان.

"ەكى جىلداي تىنباي جۇمىس ىستەگەننەن كەيىن كومپانياعا كوز تۇسە باستايدى، تانىلا باستايدى. العاشقى پروبلەمالار 2002 جىلدارى باستالدى. قارجى پوليسياسى شابۋىل جاساي باستادى. باستاپقىدا ەكى جانارماي قۇيۋ بەكەتىنەن باستاپ، كەيىن 4، سوسىن التاۋىنا كوشتى. ياعني ولار وسىلايشا ءبىزدى قورقىتپاق بولدى. مۇنى ايتۋعا بولا ما، جوق پا بىلمەيمىن، ول كەزدە ءبارى پارامەن شەشىلەتىن. قارجى پوليسياسى قالاي جۇمىس ىستەيتىنىن دە بىلەسىزدەر"، - دەيدى مەدگات قالييەۆ ORDA News-كە بەرگەن سۇحباتىندا.

"بىزدە باسقا اكسيونەر بولمادى. تەك ەكەۋىمىز: مەن جانە مارقۇم سەرىك بيمۋرزين (كاسىپكەر نۇرلان ءبيمۋرزيننىڭ اكەسى). سەرىك ەكەۋىمىز وتىرىپ، ويلانا باستادىق. "ءبولىسۋ كەرەك" دەگەن ۇسىنىستار تۇسە باستادى. سەرىك ءتىرى بولعان كەزدە ءبارىن ءوزى ايتار ەدى. سول كەزدە سەرىككە وسىنداي ۇسىنىستارمەن تىكەلەي شىققاندار بولدى. بىزگە "اقشانىڭ استىندا قالدىڭدار" دەگەندەي تۇسپالداعاندار بولدى. سەبەبى 6 وڭىردە جۇيەلى جۇمىس ىستەپ وتىردىق"، - دەيدى كاسىپكەر.

وسىلايشا ءابليازوۆقا تيەسىلى بولعان "تەمىر بانكتە" جۇمىس ىستەيتىن ادام ولارعا "كرىشا" بولۋدى ۇسىنعان.

"ول ادام بىزگە "اۋلەتكە، ونىڭ ىشىندە اليامەن بايلانىس ورناتا الامىن" دەدى. ول ادام بىزدە الدەقانداي پروبلەما بارىن ەستىپ، "سەندەردى تانىستىرايىن، سول كەزدە تىنىش جۇمىس ىستەي بەرەسىڭدەر" دەدى. وسىلاي ءاليا نازاربايەۆامەن تانىستىق"، - دەيدى مەدگات قالييەۆ.

"كرىشا" بولۋعا 2002 جىلى قارجى پوليسياسى كومپانياعا تيەسىلى بىرنەشە جانارماي قۇيۋ بەكەتىن جاۋىپ تاستاۋى سەبەپ بولعان كورىنەدى.

"بىزگە الدەكىمدەر كەلىپ، "ءبىز راحات الييەۆتىڭ ادامدارىمىز، ءبولىسۋ كەرەك" دەدى. بىزگە بەلگىلى ءبىر سومانى كورسەتتى. باستاپقىدا الييەۆكە وزدەرى ايتقان اقشانى بەردىك.

ءبىراق مۇنىمەن توقتامايتىنىن بىلدىك. سول كەزدە "تەمىر بانكتە" بانكير بولعان تانىسىمىز بار ەدى – بەرىك سارين. ول بىزگە كەلىپ "ءاليا سىزدەرمەن كەزدەسكىسى كەلەدى. سەندەردىڭ پروبلەمالارىڭنان حاباردار، سەندەردى قورعاعىسى كەلەدى" دەدى. بۇل "قورعاۋ" ءۇشىن ول كومپانيانىڭ 50 پايىزىن سۇرادى"، - دەيدى كاسىپكەر نۇرلان بايمۋرزين.

وسىلايشا كاسىپكەرلەر راحات الييەۆ جانە ءاليا نازاربايەۆا دەگەن ەكى وتتىڭ ورتاسىندا قالعان.

"بىزگە بەرىك سارين "ءاليانى تاڭداماساڭدار جاعدايلارىڭ ودان سايىن قيىندايدى" دەدى. ءاليا ول كەزدە نەبارى 21 جاستا بولعان. ول كەزدە كاسىپتەن ەشقانداي حابارى جوق، ءبىراق نازاربايەۆا دەگەن تەگى بار ادام عانا ەدى. وسىلايشا 2002 جىلى 4 قىركۇيەكتە مەن كومپانيانىڭ 100 پايىز يەسى بولا تۇرا 50 پايىزىن ءالياعا ءبولىپ بەردىم. 25 پايىزىن نۇرلانعا جازىپ، 25 پايىزىن وزىمە قالدىردىم. ءاليانىڭ ودان بولەك 4 كومپانياسى بولعان. ۆالەنتينا روگوۆا – ءاليانىڭ بارلىق كومپانياداعى وكىلى"، - دەيدى كاسىپكەر مەدگات قالييەۆ.

ونىڭ سوزىنشە، ءاليا قۇجاتتارعا قول قويعاننان كەيىن جارتى جىلداي تىنىشتىق ورناعان. كەيىننەن روگوۆا كومپانيانىڭ ىسىنە ارالاسا باستاعان.

"ءتىپتى قۇجاتتارعا قول قويعان كەزدە ءاليانىڭ "ۇستالدى" دەگەنىن ەستىپ قالدىق. ءبىراق ادام جاعدايى بولا تۇرا سونشالىق اشكوز بولادى دەپ ويلامادىم. (...) ءبىر كۇنى اليامەن كەڭسەسىندە كەزدەستىك. ول بىزدەن امان-ساۋلىق سۇراماي، "قالعان 50 پايىز ۇلەستەرىڭىز كەرەك" دەدى. مۇندايدى كۇتپەدىك، تاڭعالدىق. "ءاليا، ول بىزگە دە كەرەك" دەدىم. "ءسىزدىڭ ۇلەس ماعان كەرەك، ونى ماعان بەرۋ كەرەكسىزدەر" دەدى. ولاردىڭ ماقساتى كومپانيانىڭ كۇل-تالقانىن شىعارىپ، ساتۋ بولعان ەكەن. "سەن ەڭ قۇرىعاندا ءبيمۋرزيننىڭ ۇلەسىن ساتىپ السايشى" دەدىم. ول كوك تيىن دا بەرمەيتىنىن ايتتى"، - دەيدى مەدگات قالييەۆ.  

ونىڭ سوزىنشە، كومپانيا تاۋەلسىز جۇمىس ىستەگەن.