2027 jyly Qazaqstan Halyq keńesin qurýǵa respýblikalyq biýdjetten 1,7 mlrd teńge qarastyrý josparlanyp otyr. Bul týraly Qarjy vitse-ministri Abzal Beisenbekuly Quryltai otyrysynda 2027–2029 jyldarǵa arnalǵan respýblikalyq biýdjet jobasyn tanystyrý kezinde aitty, dep habarlaidy dalanews.kz.
Atalǵan shyǵyn qaýipsizdik, memlekettik basqarý jáne rezervter baǵyty boiynsha kózdelgen qosymsha qarajat quramyna engizilgen. Vitse-ministrdiń baiandamasynda Qazaqstan Halyq keńesin qurýǵa 1,7 mlrd teńge bólý usynylǵany kórsetildi.
Degenmen ázirge bul qarjynyń naqty qandai maqsattarǵa jumsalatyny naqtylanbaǵan. Qarajattyń keńestiń qyzmetin uiymdastyrýǵa, kadrlyq qamtamasyz etýge nemese materialdyq-tehnikalyq bazasyn qalyptastyrýǵa baǵyttalatyny jóninde jeke túsindirme berilgen joq. Bul soma ázirge biýdjet jobasy aiasynda qarastyrylyp otyr.
Jalpy alǵanda, 2027 jyly qaýipsizdik, memlekettik basqarý jáne rezervter baǵytyna 4,9 trln teńge bólý josparlanǵan. Onyń ishinde kúshtik qurylymdardy qarjylandyrýǵa 3,3 trln teńge, memlekettik basqarý salasyna 787 mlrd teńge qarastyrylǵan.
Sondai-aq Úkimet rezervin 370 mlrd teńge, al Prezident bastamalaryn iske asyrýǵa arnalǵan rezervti 470 mlrd teńge kóleminde qalyptastyrý kózdelip otyr.
Abzal Beisenbekulynyń málimetinshe, respýblikalyq biýdjet jobasyn ázirleý barysynda memlekettik organdardyń shyǵys ótinimderi qaita qaralǵan. Bastapqy kezeńde vedomstvolar 2027 jylǵa 36,9 trln teńge kóleminde qarjy suratqan. Alaida talqylaý nátijesinde 30,2 trln teńge kólemindegi shyǵystar ǵana qoldaý tapqan.
Osylaisha, memlekettik organdar usynǵan shyǵystardyń shamamen 6,7 trln teńgesi biýdjet jobasyna engizilmegen. Baiandamashy muny biýdjet múmkindikteriniń shekteýliligimen jáne qarjyny basym baǵyttarǵa shoǵyrlandyrý qajettiligimen bailanystyrdy.
