2027 жылы Қазақстан Халық кеңесін құруға республикалық бюджеттен 1,7 млрд теңге қарастыру жоспарланып отыр. Бұл туралы Қаржы вице-министрі Абзал Бейсенбекұлы Құрылтай отырысында 2027–2029 жылдарға арналған республикалық бюджет жобасын таныстыру кезінде айтты, деп хабарлайды dalanews.kz.
Аталған шығын қауіпсіздік, мемлекеттік басқару және резервтер бағыты бойынша көзделген қосымша қаражат құрамына енгізілген. Вице-министрдің баяндамасында Қазақстан Халық кеңесін құруға 1,7 млрд теңге бөлу ұсынылғаны көрсетілді.
Дегенмен әзірге бұл қаржының нақты қандай мақсаттарға жұмсалатыны нақтыланбаған. Қаражаттың кеңестің қызметін ұйымдастыруға, кадрлық қамтамасыз етуге немесе материалдық-техникалық базасын қалыптастыруға бағытталатыны жөнінде жеке түсіндірме берілген жоқ. Бұл сома әзірге бюджет жобасы аясында қарастырылып отыр.
Жалпы алғанда, 2027 жылы қауіпсіздік, мемлекеттік басқару және резервтер бағытына 4,9 трлн теңге бөлу жоспарланған. Оның ішінде күштік құрылымдарды қаржыландыруға 3,3 трлн теңге, мемлекеттік басқару саласына 787 млрд теңге қарастырылған.
Сондай-ақ Үкімет резервін 370 млрд теңге, ал Президент бастамаларын іске асыруға арналған резервті 470 млрд теңге көлемінде қалыптастыру көзделіп отыр.
Абзал Бейсенбекұлының мәліметінше, республикалық бюджет жобасын әзірлеу барысында мемлекеттік органдардың шығыс өтінімдері қайта қаралған. Бастапқы кезеңде ведомстволар 2027 жылға 36,9 трлн теңге көлемінде қаржы сұратқан. Алайда талқылау нәтижесінде 30,2 трлн теңге көлеміндегі шығыстар ғана қолдау тапқан.
Осылайша, мемлекеттік органдар ұсынған шығыстардың шамамен 6,7 трлн теңгесі бюджет жобасына енгізілмеген. Баяндамашы мұны бюджет мүмкіндіктерінің шектеулілігімен және қаржыны басым бағыттарға шоғырландыру қажеттілігімен байланыстырды.
