Prokýratýra urlanǵan qarajattyń film túsirýge bólingenin atap ótip, alaida qai film týraly aityp jatqanyn naqtylamaǵan.
DALA INSIDE telegram arnasyna belgili bolǵandai áńgime «Uly dala tańy» filmine qatysty órbýde.
«Quny 4 milliard teńgeden asatyn (8,6 mln dollar) aýqymdy jobany aiaqtadym», – dep jazǵan edi buǵan deiin rejisser Aqan Sataev. Ol dál sol tusta kinostýdiia basshysy bolatyn.
Kinopoisk portalynda 2022 jyly shyqqan «Uly dala tańy» filminiń prodiýseri Áliia Nazarbaeva dep kórsetilgen.
«Sataev pen Nazarbaeva» tandemi «Uly dala tańynan» bólek birneshe jobalardy birigip atqarǵany belgili.
Dálireginde, Aqan Sataev 2020 jyly «Qazaqfilmniń» prezidenti bolyp taǵaiyndalyp, sodan bergi ýaqytta Áliia Nazarbaevamen tyǵyz qarym-qatynasta jumys istei bastady.
Áliia Nursultanqyzy 2019 jyly Sataev túsirgen «Tomiris» tarihi filminiń bas prodiýseri jáne stsenarii avtorynyń biri dep kórsetilgen. DALA INSIDE-tyń málimetinshe Áliia Nazarbaevaǵa «Tomiris» filminiń stsenariii úshin 149 million teńge tólengen.
«Qazaqfilmmen» jasalǵan kelisimge sáikes, ol (Nazarbaeva, red.) avtor retinde telearnadaǵy prokattan túsken paidanyń 60%-yn, el kinoteatrlarynda prokattan túsken tabystyń 70%-yn jáne respýblikadan tys kinoteatrlarda kórsetilgen prokattyń 40%-yn alýǵa quqyly bolǵan.
«Tomiristi» túsirý úshin memleket 3 milliard teńgeden astam qarjy jumsaǵanyn bireý bilse, bireý bilmes.
Nazarbaeva prodiýserlik etken «Tomiris» filmin sol tustaǵy Mádeniet jáne sport ministrliginiń tapsyrysy boiynsha «Sataifilm» kompaniiasymen birlestikte «Qazaqfilm» kinostýdiiasy túsirdi.
Sataev pen Nazarbaevanyń «Anaǵa aparar jol» kinodramasy memlekettik syilyqpen marapattaldy.
Aita ketý kerek, jaqynda Antikor «Kóshpendiler» filmindegi bekinis satyp alý tranzaktsiiasynyń qunyna qatysty derektiń shetin shyǵarǵan. Ony burynǵy Mádeniet ministri Arystanbek Muhamediulyna qatysty kompaniia satyp alǵan bolyp shyqty. Iaǵni, 2017 jyly jalǵan bekinis salynǵannan 44 ese arzan baǵaǵa satylǵan.
Antikor bul qylmystyq iske eks-ministrdiń qatysy bar-joǵyn tekserip jatqanda, «Qazaqfilmniń» burynǵy basshysyna qatysty tergeý amaldary da bastaldy.
Belgili rejisser filmderine Nazarbaevtyń kishi qyzyn bas prodiýserlikke tartý arqyly Áliiany berik «qamal» retinde paidalandy ma? Bálkim, ekeýi áý bastan sybailas shyǵar, kim bilsin?
