Al, men múlde riýmke ustamaityn adammyn. Eshqashan ishimdiktiń dámin tatyp kórmegem. Prezident bárimen soǵystyryp kelip, maǵan kelgende: «Oi, sizdiń bokalyńyz...», – dedi. Men: «Nureke, men bokal ustamaýshy edim», – dedim. «Ustamai-aq qoiyńyz, ustamaǵynyńyz jaqsy», – dedi Elbasy.
Úige kelgennen keiin, bir top áńgime tyńdaimyz dep kelgenderdiń ishinde Shámshá Berkimbaeva «Neń keter edi, eń bolmasa ótirikten bolsyn soǵystyra salmadyń ba. Ondai múmkindik bola bere me?» - dep ursyp jatyr maǵan. Sosyn, men: «Ái, Shámen, birinshiden Qudai kórip tur. Ekinshiden, shampan ishkenderdiń eshqaisysy esinde qalmaidy, ishpegen men qalam esinde» – dep ázildedim.
Sol kezdesýdiń aldynda jattap alyńyzdar dep bárimizge bir ánniń mátinin berdi. Onysy «Vesna na zarechnoi ýlitse» degen orystyń eski kinosyndaǵy án. Ony prezident jaqsy kóredi eken. Prezident jaqsy kóretin qazaqtyń nebir áibát ánderi bar ǵoi. Sosyn qaǵazyn qaitaryp berip: «Men orystyń ánin aitpaq túgili, sózin sóilei almaimyn», – dep án mátini jazylǵan qaǵazdy qaitaryp berdim.
Sonda Prezident apparatyndaǵylardyń eń jynymdy ustatqany – maǵan prezidentke sálem salǵyzbaq bolǵandary. «Kelgen áielderdiń bári sálem jasai ma?» – desem: «Joq, siz ǵana», – deidi. Sonda 16 kelinshektiń arasynda jalǵyz zeinetker maǵan sálem salǵyzbaq. Men bas tarttym. Sebebin túsindirmedim de. Ol jerde jýrnalister, fotograftar qaptap júr.
Men prezidentke sálem salsam, jan-jaǵymnan túsiredi. Sodan keiin, interneti bar, gazeti bar, bárine beredi. Sosyn: «Basy eshkimge iilmegen Baýkeńniń kelini prezidenttiń kishkentai syilyǵy úshin, taǵzym etip jatyr», – dep turyp jazady.
Ana Ábishti qalai jazdy. Sonyń bári ol kisige qalai aýyr tigenine eshkim mán bermedi. Al Ábishtiń otbasynda qoldan súiý – daǵdyly nárse. Myna jerde meni de sóiter edi. Meni qoishy, atamnyń aty qosylyp aitylar edi...
«Prezidentti maqtańyz», – deidi. Maqtamaitynymdy aittym. «Mensiz de Paiǵambar men Qudaiǵa teńep maqtap qoiǵandar jetkilikti. Uiat emes pe? 5 jastaǵy bala qusatyp arqasynan qaqqandai. Meniń maqtaýyma muqtaj bop tur ma ol kisi?» – dedim. Prezident meni maqtasyn dep tapsyrma bermegen shyǵar...
Sóitip, Nurekeńmen kezdesýde ne óleń aitpadym, ne maqtamadym, ne sálem jasamadym. Keiin Prezident apparatyndaǵylar men siiaqty qyrsyqtan qutylǵanyna qýanǵan shyǵar...
Zeinep Ahmetova,
Halyq qaharmany Baýyrjan Momyshulynyń kelini,
jazýshy, etnograf
Derekkóz: Abai.kz
