Shamalǵandaǵy Bolat Nazarbaevtyń atshaptyrym kotejin kózben kórmek bolyp sonaý Máskeýden kelgen «Moskovskıı komsomolestiń» tilshisi aýyl turǵyndarymen tildesip, biraz aqparat alǵanǵa uqsaıdy.
Álbette, reseılik presanyń pozısıasy men túpki pıǵylyn jaqsy biletindikten, olar taratqan málimetke kózsiz sene berýge taǵy bolmaıdy. Áıtse de jerdiń túbinen kelip turyp, maqalany kil ótirikten qurastyrmaǵanyna sengimiz keledi.
Sonymen, Shamalǵanǵa at basyn burǵan «Moskovskıı komsomolestiń» tilshisi turǵyndarmen tildese kele mynadaı málimetke qanyǵypty:
Eks-prezıdent Jańaózende gaz baǵasynyń kúrt ósýine baılanysty beıbit mıtıńi bastalǵan shaqta kindik qany tamǵan Almaty mańyndaǵy Shamalǵan aýylyna kelgen.
Nazarbaevtyń týyp ósken jeri jaıly el arasynda ár túrli alyp-qashpa áńgime jıi aıtylady. Qaısysy aqıqat, qaısysy ańyz? Biri – ol aýyldy qarý asynǵan adamdar kúzetip júredi dese, biri «Nazarbaev áýletiniń záýlim úıin sýretke túsirýge bolmaıdy, et jaqyndary jatqan qabirstandy táýlik boıy kúzetip turady» deıdi-mys.
Reseılik jýrnalıs Nazarbaev áýletiniń zıratyna barǵan. Bul jerde ata-anasy, aǵasy jáne 2020 jyly qaıtys bolǵan inisi Bolattyń jary Gúljan jerlenipti. Odan basqa topyraǵy sýymaǵan mola joq eken.
Zırat kúzetshisi tilshige "qańtardyń 2 men 3-i kúni aýyl turǵyndarynyń oqqaǵarlarmen júrgen jıpterdi baıqaǵanyn" aıtqan.
"Maǵan Nazarbaev zırat basyna keletinin aıtty. Jan-jaqty tazalap daıyndap qoıdyq. Biraq kelmedi".
Qaraýyl "Eks-prezıdent aman-saý, Nazarbaevtyń ómirden ótkenin aldymen aýyldastary estir edi" degen pikir bildirgen.
"Egerde dúnıeden ótip ketse, barlyǵymyz biler edik. Kórgen adamdar bar. Hali jaqsy, qasynda kúzetshilerimen júr" deıdi qorym qaraýyly.
Shamalǵanda ákimshilikte isteıtin bir adam kelesideı málimetpen bólisip:
"Nazarbaev munda jańa jyldan keıin keldi. Germanıada ota jasatqan, odan keıin Izraılde emdelgen inisi Bolattyń halin bilip qaıtqan. Nazarbaev sol kúnderi aýyl aqsaqaldarymen kezdesken. Kishigirim jınalys ótti. Meniń bilýimshe, sodan keıin Elbasy jáne onyń keıbir otbasy músheleri brondalǵan avtokólikterimen qyrǵyz shekarasyna qaraı bet aldy.
Qyrǵyz aǵaıyndar qarsy alyp, áýejaıǵa jetkizip, sol jerden barlyǵy Arab Ámirlikterine ushyp ketti.
Japarov Nazarbaevty qutqaryp qaldy. 2010 jyly sol tustaǵy Qyrǵyz basshysy Bákıev elden qashqanda, oǵan aldymen Nazarbaev járdemdesken edi» dep kóptiń kókeıinde júrgen kúmándi seıiltkendeı bolypty.
Reseılik jýrnalıspen tildesken taǵy bir turǵyn Bolat Nazarbaevtyń úıine ury túskeni týraly aqparatty joqqa shyǵarypty.
"Mıtıń bastalǵan tusta Bolattyń úlken qyzy úıimizdi tonap ketti dep kórshilerge muńyn shaǵypty. Keıin bul aqparat aýyldan asyp, Almatyǵa tarap ketti. Bul úıdi kim tonaýy múmkin dep tańǵalysqan edik. Sebebi tus-tusy kamera, qarý asynǵan qaraýyldary qanshama. Sóıtsek ótirik aıtypty», – deıdi ol.
...
Ras, Nazarbaev úshin BAÁ bóten el emes. Jylyna birneshe ret, osy jyly mekenge saparlaıdy. Ótken jyldyń 28 qazanynda Abý-Dabıge kelgen kezde, Elbasy taq murageri sheıh Muhammed ben Zaıd Ál Nahaıanmen kezdesip, hanzadaǵa "Iadrolyq qarýsyz álem úshin" syılyǵyn tapsyrǵan edi.
[caption id="attachment_72716" align="alignnone" width="835"]
Shamalǵandaǵy Abý-Dabı kólik jýý kesheni[/caption]
Demek bul Nursultan men taq murageri arasynda jyly qarym-qatynas qalyptasqanyn kórsetse kerek.
Nazarbaev klanynyń aqshasy BAÁ-de saqtalatyny týraly aqparat ta negizsiz emes. Ámirlikterde otbasy men jaqyn seriktesteriniń elıtalyq jyljymaıtyn múlki de osy memlekette.
Sondaı-aq kishi qyzy Álıaǵa tıesili vıllalar da bar.
Al Shamalǵan turǵyndary Nazarbaevtyń ushty-kúıli joǵalǵanymen sharýasy joq sekildi. Áýlettiń taǵdyryna da ýaıymdap otyrǵanǵa uqsamaıdy. Reseılik tilshimen tildesken turǵyndardyń basym kópshiligi eń bastysy beıbit mıtıńke shyqqan halyqtyń talaby oryndalǵany mańyzdy ekenin aıtqan.
...
Dese de Nazarbaevtyń shetel asqany áli anyq emes. Al áýlet músheleriniń kópshiligi Dýbaıdy panalaǵanǵa uqsaıdy. Nazarbaevtyń kishi qyzy Álıa Nazarbaevanyń álemjelidegi sońǵy jazbasyn oqyǵan oqyrmandar onyń Arab Ámirliginde júrgenin ańǵaryp qoıǵan.
Qýanysh RAHMETOLLAULY
