Belgili saiasatker Ákejan Qajygeldin Jusan bank pen Nazarbaev qorynyń bailanysy týraly jáne bankke memleketten quiylǵan milliardtar týraly aitty, - dep habarlaidy Dalanews.kz.
«Timýr Qulybaev 150-200 tsisterna qaitardy» dep jarysa aitady da, bári «oo, aqyry aktivter qaitaryla bastady ǵoi» dep oilaidy. Al shyn máninde eshteńe qaitarylyp jatqan joq. Ol (Qulybaev) saýdasyn baiaǵydai júrgizip júr. Gaz Qara teńizge burynǵydai tasymaldanyp jatyr. Elde gazǵa qatystynyń bárine bir áýletpen bailanysty ekenin bilemiz. Arasynda oryndary aýysyp qana turady. Sháripbaev kelse sol ainalysady, Boranbaev bolsa sol ainalysady – bári bir áýlettiń qolynda. Birde-bir aýdit júrgizbei ne bolǵanyn túsindire almaimyz», - deidi Ákejan Qajygeldin Elmedia-ǵa bergen suhbatynda.
Qajygeldin Jusan bank pen Nazarbaev qorynyń bailanysy týraly aitty.
«Jusan bank iesi Nevadada. Onyń qaltasyna aspannan dolbarlap aitqanda 1,2 milliard aktiv tústi. Bul óte kóp aqsha. Bireý olarǵa bul aqshany berdi. Kim ekenin de bilemiz. Biraq muny Qazaqstan biligi ózi málimdep aitqanyn qalaimyz. Tergeý júrgizip, aqsha qaidan túskenin aitýy kerek. 1,2 milliard bir jerden kelse, demek ol aqsha bir jerden shyqty ǵoi? Biz bul Nazarbaev qorynan túsken aqsha dep oilaimyz. Al qordaǵa aqsha Nazarbaevtyń qarjysy emes, ol memlekettiń aqshasy. Sebebi onyń barlyq kitabyn satqannyń ózinde ary ketse úsh million jinalady. Biraq 1,2 milliard emes», - deidi Qajygeldin.
Al Májilis depýtaty Ermurat Bapidiń sózinshe, Nazarbaev qorymen, Jusan bank-pen Qazaqstan úkimeti jumys istep jatyr.
«Maǵan jetken aqparattar boiynsha jáne memlekettik organdardyń túsindirýi boiynsha, Nazarbaev qorymen, Jusan bank-pen Qazaqstan úkimeti jumys istep jatyr. Ol jóninde qoǵamǵa aqparat berilmeidi. Ol qalai istep jatyr? Qandai maqsatta, qandai negizde jumys istep jatqanyn biz bilmeimiz. Biraq mendegi aqparat boiynsha Qazaqstan úkimeti Jusan bank-qa óz erkimen kelisimder men belgili mólsherde aktivterdi qaitarý máselesi jóninde áńgime bolyp jatyr. Biraq onyń naqty tetikterin bilmeimin», - deidi Ermurat Bapi Elmedia-ǵa bergen suhbatynda.
Depýtat májilistiń kúzgi sessiiasy bastalǵan kezde birneshe depýtat Bas prokýratýraǵa saýal joldap, aktivterdi qaitarý zańynyń oryndalý barysy jóninde qandai jumystar atqarylǵany týraly esep suraitynyn aitty.
«Eger ony qoǵamǵa estýge bolmasa tym quryǵanda depýtattardyń aldynda jabyq túrde esep berse degen usynyspen shyǵamyz. Sebebi biz zańdy qabyldaimyz, óndiriske beremiz, biraq zańnyń oryndalý barysyn baqylai almaimyz. Bul nonsens qoi! Al biz qabyldap bergen zańdy tiisti memlekettik organdar óziniń yńǵaiyna qarai buryp alady. Bul da bizdiń qoǵamdaǵy zańnama máselesindegi problema», - deidi depýtat.
Sonymen qatar, depýtat Timýr Qulybaevtyń Germaniiadaǵy aktivteri týraly aitty.
«Qarap otyrsaq, Qulybaev aktivterdi jyljymaityn múlik kóleminde qaitaryp jatyr. Al Qulybaevtyń munai aktivteri jóninde áńgime joq. Ol jaqqa áli barǵan da joqpyz. ALMEKS arqyly qanshalyq munai salasynda aktivi bar, ony qaitarý kerek, biraq ol jaily áńgime joq. Biz muny kóterdik, biraq bilik tarapynan naqty jaýap joq. Qarabaiyr jaýappen bizdi aldaidy», - deidi Ermurat Bapi.
Aita keteiik, buǵan deiin Ákejan Qajygeldin Nazarbaevtyń kúieýbalasy Timýr Qulybaevtyń Qazaqstandaǵy memlekettik organdaryndaǵy yqpaly, Samat Ábish isi men eldegi júie týraly aitqan bolatyn. Qajygeldinniń sózinshe, Timýr Qulybaevtyń memlekettik organdardyń sheshimderine áseri prokýratýranyń, zańdardyń, Májilistiń, Úkimet pen Prezident Ákimshiliginiń yqpalynan kúshtirek. Ol Qulybaevtan qutylý úshin barlyq zańdardy qaita qaraýymyz keregin aitqan edi.
