"Halyqtyń alańdaýyna negiz joq. Búgingi kúni qos bılik joq. Ol bolýy da múmkin emes. Búgingi kúni barlyq sheshimdi halyq saılaǵan memleket basshysy Qasym-Jomart Toqaev ózi qabyldap otyr. Al eks-prezıdent qazir memleket isine aralaspaıdy. Ekinshiden, onyń kezdesýleri nemese ótkizip jatqan is-sharalary, jol saparlary onyń barlyǵy jeke azamat retinde óziniń quqyǵyn paıdalanyp júrgen is-sharalar men kezdesýler" dedi Qoshanov.
Májilis tóraǵasy sonymen birge "eks-prezıdent Qazaqstannyń memlekettik ánuranynyń avtorlary qatarynan alyna ma?" degen suraqqa da jaýap berdi.
"Ondaı zań bizge túsken joq... Másele kún tártibinde turǵan joq" dedi Qoshanov.
Nursultan Nazarbaev 2019 jyly naýryzda otstavkaǵa ketip, óziniń ornyna Qasym-Jomart Toqaevty qaldyrǵan. Nazarbaev 2022 jyldyń qańtaryna deıin Qaýipsizdik keńesiniń tóraǵasy sıaqty mańyzdy qyzmetterde otyrdy. Nazarbaev pen Qasym-Jomart Toqaev sol kezde elde qos bılik baryn joqqa shyǵarǵan.
Jýyrda eks-prezıdent Nazarbaev "Astana klýby" otyrysyn ótkizip, Máskeýge baryp, Reseı basshysy Vladımır Pýtınmen jeke kezdesken.
DALA INSIDE telegram arnasynyń habarlaǵanyndaı Ábishuly atyshýly memýaryn aldyǵa salyp barǵan. "Meniń ómirim" deıtin ǵumyrnamalyq eńbeginde eks-prezıdent Pýtınniń maqtaýyn asyryp, astyna kópshik tósegen-di.
"Nazarbaevtyń Kreml kósemine kózbe-kóz aıtar jeke buıymtaıy bar. Táýelsizdik kúni Máskeýge ushyp ketken "tuńǵyshtyń" áreketinen-aq, onyń ulyq merekege atústi qaraıtynyn ańǵarýǵa bolady. Kremlden uzap shyqpaıtyn Pýtınniń Ábishulyn shamaly kúte turýǵa shydamy jeter edi. Demek, zeınetkerdiń júregi tynysh emes. Áldenege alaburtyp júr. Táýelsizdik merekesin tárk etip, Máskeýge attanyp ketken Nurekeńniń bul ketisi tegin emes dep topshylaýǵa bolady", - deıdi DALA INSIDE.
Aıtqandaı, Adamdy daýysynan taný tehnologıasymen aınalysatyn Speech Craft Analytics negizin qalaǵan maman Devıd Poýp Vladımır Pýtınniń osy aptada Orys halyq keńesinde sóılegen sózi men bıyl mamyrdaǵy Jeńis kúnindegi sóziniń aýdıolaryn 10 fýnksıa boıynsha tekserip, eki sharada eki túrli adamnyń sóılegenin anyqtaǵan.
"Ár adamnyń saýsaq izderi sıaqty, daýys tembrinde de eshkim qaıtalaı almaıtyn biregeı erekshelikteri bolady" , - deıdi, Devıd Poýp.
Tolyǵyraq osy jerde: https://t.me/dalainside/1603
