Qazaqstannyń tuńǵysh prezidenti Nursultan Nazarbaev Astanadaǵy Ortalyq meshitke bardy, dep habarlaidy Dalanews.kz.
Videony áleýmettik jelidegi paraqshasynda meshit azanshysy Qýanysh Seiithanov jariialady. Kadrlarda Nursultan Nazarbaev kúzet qyzmetkerlerimen birge meshit ishin aralap júrgeni kórinedi.
"21 maýsymda QR tuńǵysh prezidenti Nursultan Ábishuly Nazarbaev bas meshitke keldi", - dep jazǵan ol.
Sondai-aq, kadrlardan Nazarbaevtyń meshittegi halyqpen tildeskeni de kórinedi.
"Aman bolyńyz, denińiz saý bolsyn! Júz jasańyz!" - dep tilegen halyq videoda.
Aita keteiik, bul meshitti 2022 jyly Nursultan Nazarbaevtyń ózi ashqan bolatyn.
Eske salaiyq, jýyrda Nursultan Nazarbaev Máskeýge jeke shaqyrý boiynsha bardy. Onyń bul sapary qoǵamda túrli alyp-qashpa áńgime, kúmán-kúdik týýyna sebep boldy.
Al eks-prezidenttiń baspasóz hatshysy Aidos Úkibaidyń aitýynsha, tuńǵysh prezident álemniń birqatar eliniń kóshbasshylarymen telefon arqyly sóilesip, hat almasyp, keide jeke kezdesip turady.
