– Turmysy tómen azamattarǵa jáne kópbalaly otbasylarǵa kómek kórsetý kerek. Ár qazaqstandyq otbasy júrgizilip jatqan reformalardyń tıimdiligin bolashaqta emes, dál búgin sezinýi tıis. Ásirese, kópbalaly otbasylardy qoldaýdy kúsheıtý qajet dep sanaımyn, – dedi Nazarbaev "Nur Otan" partıasynyń sezinde.
Onyń aıtýynsha, elimizde 340 myńnan astam otbasynda keminde tórt bala bar. Jyl saıyn balasy bar otbasylardy qoldaýǵa 500 mıllıard teńge bólinedi.
– Biraq, ár otbasynyń kirisi ártúrli. Bireýiniki az, bireýiniki ortasha, endi biriniki kóp. Osyny eskerý kerek. Mıllıonerlerge memleketten qosymsha kómek kórsetip ne kerek. Memleket, eń aldymen tabysy tómen kópbalaly otbasylarǵa kómek kórsetýi tıis.
Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeıtýdi tapsyramyn. Atalǵan kórsetkishti kúnkóris deńgeıiniń 70 paıyzyna deıin jetkizýimiz kerek.
Ataýly áleýmettik kómek alýǵa quqyly balasy bar otbasylardy qoldaý úshin kópbalaly otbasylarda ár balaǵa eń tómengi tólemdi 21 myń teńge shamasynda bekitýdi tapsyramyn.
Halyq ary-beri shapqylap júrmesin. Sosyn ondaı otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áıtpese, sonyń bárin sanaǵanda kópbalaly otbasylar baı azamattar bolyp shyǵa keledi, – dedi Nazarbaev.
