– تۇرمىسى تومەن ازاماتتارعا جانە كوپبالالى وتباسىلارعا كومەك كورسەتۋ كەرەك. ءار قازاقستاندىق وتباسى جۇرگىزىلىپ جاتقان رەفورمالاردىڭ تيىمدىلىگىن بولاشاقتا ەمەس، ءدال بۇگىن سەزىنۋى ءتيىس. اسىرەسە، كوپبالالى وتباسىلاردى قولداۋدى كۇشەيتۋ قاجەت دەپ سانايمىن، – دەدى نازاربايەۆ "نۇر وتان" پارتياسىنىڭ سەزىندە.
ونىڭ ايتۋىنشا، ەلىمىزدە 340 مىڭنان استام وتباسىندا كەمىندە ءتورت بالا بار. جىل سايىن بالاسى بار وتباسىلاردى قولداۋعا 500 ميلليارد تەڭگە بولىنەدى.
– ءبىراق، ءار وتباسىنىڭ كىرىسى ءارتۇرلى. بىرەۋىنىكى از، بىرەۋىنىكى ورتاشا، ەندى بىرىنىكى كوپ. وسىنى ەسكەرۋ كەرەك. ميلليونەرلەرگە مەملەكەتتەن قوسىمشا كومەك كورسەتىپ نە كەرەك. مەملەكەت، ەڭ الدىمەن تابىسى تومەن كوپبالالى وتباسىلارعا كومەك كورسەتۋى ءتيىس.
ۇكىمەتكە الەۋمەتتىك جاعىنان از قامتىلعان ازاماتتاردى، اسىرەسە، كوپبالالى وتباسىلاردى قولداۋ شارالارىن كەڭەيتۋدى تاپسىرامىن. اتالعان كورسەتكىشتى كۇنكورىس دەڭگەيىنىڭ 70 پايىزىنا دەيىن جەتكىزۋىمىز كەرەك.
اتاۋلى الەۋمەتتىك كومەك الۋعا قۇقىلى بالاسى بار وتباسىلاردى قولداۋ ءۇشىن كوپبالالى وتباسىلاردا ءار بالاعا ەڭ تومەنگى تولەمدى 21 مىڭ تەڭگە شاماسىندا بەكىتۋدى تاپسىرامىن.
حالىق ارى-بەرى شاپقىلاپ جۇرمەسىن. سوسىن ونداي وتباسىلاردىڭ تابىسىن ەسەپتەگەندە باسقا الەۋمەتتىك جاردەماقىلاردى ساناۋدى الىپ تاستاۋ قاجەت. ايتپەسە، سونىڭ ءبارىن ساناعاندا كوپبالالى وتباسىلار باي ازاماتتار بولىپ شىعا كەلەدى، – دەدى نازاربايەۆ.
