Almaty oblysy men Jetisý óńirindegi sý tapshylyǵy, infraqurylymnyń tozýy jáne biýdjettik teńsizdik máseleleri Astanada ótken erekshe formattaǵy jiynda talqylandy. Bul kezdesýdi QR Parlamenti Senatynyń depýtaty, Almaty oblysynan sailanǵan Janbolat Jórgenbaev uiymdastyrǵan, dep habarlaidy Dalanews.kz.
Senat qabyrǵasynda ótken jiynǵa Almaty oblysynyń Raiymbek, Kegen, Uiǵyr, Balqash jáne Eńbekshiqazaq aýdandarynyń ákimderi qatysty. Senator Jórgenbaev aýdan basshylaryn elordaǵa shaqyryp, ministrlikter men ortalyq atqarýshy organ ókilderimen tikelei kezdestirýdi maqsat etken. Ásirese Qonaevtan shalǵai ornalasqan Narynqol, Kegen jáne Shonjy aýyldarynyń jaǵdaiyn ókiletti organnyń ókilderine ákimderdiń óz aýzymen aitýyna múmkindik týdy, deidi depýtat.
“Bul bastama — shalǵai óńir ákimderiniń Úkimet deńgeiinde óz máselelerin ashyq aitýyna múmkindik bergen tyń format retinde baǵalandy. Jiynda sóz bolǵan eń ózekti másele — sý tapshylyǵy. Sýarmaly alqaptar men aýyl sharýashylyǵyna qajetti infraqurylymnyń eskirýi, Keńes dáýirinen qalǵan júielerdiń isten shyǵýy búginde Raiymbek pen Kegen óńirindegi turǵyndardy ábigerge salǵan”,– deidi Janbolat Jórgenbaev.
Bir top senatorlar men májilismender osy baǵytta sońǵy jyldary júieli jumys júrgizip keledi. Ol sý sharýashylyǵyna qatysty jańa zań jobalarynyń qabyldanýyna jáne Sý resýrstary jáne irrigatsiia ministrliginiń qurylýyna bastamashy bolǵandyǵy. Osy otyrysqa qatysqan Májilis depýtaty Anas Baqqojaev áleýmettik jelidegi jazbasynda kezdesýdiń nátijeli ótkenin atap ótti:
«Baiaǵyda aýdan ákimderin Astanaǵa shaqyryp, ministrlermen betpe-bet júzdestirip, sheshilmegen máselelerdiń túiinin tarqatsa ǵoi dep armandaitynbyz. Búgin sol arman oryndalǵandai. Ákimder bul jinalystan “Senimdi bolsań — argýmentińdi qarý qyl, qujatyńmen uryp jyq!” degen messedj aldy», – deidi depýtat.
Bul ózgeshe format. Ol aldaǵy ýaqytta da jalǵasyn tapsa deimin. Ekonomika ministriniń birinshi orynbasary Azamat Amrin jiynda jańa Biýdjet kodeksiniń printsipterin túsindirip, aýdandardyń qarjylyq josparlaý kezindegi olqylyqtaryna nazar aýdardy, deidi depýtat.
Kezdesý barysynda Narynqol, Kegen syndy shalǵai aýyldardyń áleýmettik máseleleri de sóz boldy. Mysaly, Raiymbek aýdanyna qarasty Qainar aýylynda 3 myń adam turady, biraq sport kesheni, balabaqsha, zamanaýi mektep pen aýrýhana joq. FOK (fizkýltýra-saýyqtyrý kesheni) jobasy daiyndalǵanymen, eki jyldan beri qarjy bólinbei keledi.
Senator Jórgenbaevtyń bul bastamasy qoǵam tarapynan oń baǵalandy. Halyqtyń máselesin Parlament qabyrǵasyna jetkizý, aýdan ákimderi men ortalyq organdar arasynda tikelei dialog ornatý — óńirlik damý úshin mańyzdy qadam dep tanyldy. Osyndai kezdesýler jii ótip tursa, shalǵaidaǵy aimaqtardaǵy teńsizdik pen qarjy tapshylyǵynyń túiini tezirek sheshiler edi, deidi otyrys qatysýshylarynyń biri senator Zákirjan Kýziev.
Almaty oblysy men Jetisý óńiri – tabiǵaty bai, biraq infraqurylymdyq turǵydan kúrdeli aimaq. Osy óńirden sailanǵan depýtattar bul bastama aýyl halqynyń naqty máselesin sheshýge baǵyttalǵan jaýapkershilikti jáne óńirge adaldyqty kórsetedi. Muny aldaǵy ýaqytta da dástúrge ainaldyramyz, dep tarqasty.
