Naýryz – izgilik pen igiliktiń merekesi
Ulystyń uly kúninde jasalatyn ulttyq ádet-ǵuryptardyń urpaqqa berer tárbiesi men taǵylymy mol. Asyl dinimizben úilesken ulttyq merekemiz adamzat balasyn baýyrmaldyq pen tatýlyqqa, meiirbandyq pen dostyqqa úndeidi.
Jasqa jaqsylyq tileý – jasamystyń myzǵymas mindeti. Úmbetei jyraý: «Aqsaqalǵa jarasar, tileýqorlyq ailasy», – dep jyrlaidy. Mereili mereke kúnderi abyz aqsaqal men batagói qariianyń: «Kósegeń kógersin», «Jasyń uzaq bolsyn», «Qataryńnyń aldy bol», – degen bata-tilegin alǵan bala «uiada ne kórse, ushqanda sony iletin» bolady. Balaǵa bata berý, ol úshin Jaratqannan jarylqaý tileý – paiǵambarlar zamanynan beri kele jatqan saýaby mol súnnet amal.
Aq samaily duǵagói ájelerdiń túrli dán-daqyldan jasaǵan naýryz kójesi – merekeniń mánin keltiretin nyshan. Shyn kóńil, shynaiy nietpen jasalǵan as adamdar arasynda meiirimdilik pen keshirimdilik syndy asyl qasietterdi qalyptastyrady. Sadaqanyń abzaly – halyqqa as berý.
Kókpar tartyp, jamby atý, at shaptyryp, balýan kúrestirý – naýryz merekesiniń sánin arttyratyn igi sharalar. Paiǵambarymyz Muhammed (oǵan Allanyń salaýaty men sálemi bolsyn) balany atqa mingizip, sadaq atýǵa, sýda júzýdi úiretip, kúrestirýdi ósiet etken. Óskeleń urpaqty batyrlyq pen batyldyqqa tárbieleitin ulttyq sporttyq oiyndarymyz Alla Elshisiniń súnnetimen úndesip, kórkem úilesim tapqan.
Biz «Bir tal kesseń, on tal ek» degen maqaldy tirshiliktiń qaǵidasyna ainaldyrǵan halyqpyz. Úlkennen úlgi bolyp, urpaqqa jalǵasqan ónegeli ómirlik daǵdylarymyzdyń biri – ata men balanyń aǵash otyrǵyzýy. Naýryzda kórinis tabatyn osynaý igi amaldyń máni erekshe. «Qiiamet bolaryn bilip tursań da qolyńdaǵy bir túp aǵashty otyrǵyzyp qal», – degen hadistiń tárbielik maǵynasy tereńde jatyr.
Naýryz merekesinde kórshi-qolań, quda-jekjat, aǵaiyn-týysty aralap, aman-saýlyq surasyp, máre-sáre kúi keshemiz. Er kisiler tós qaǵystyryp, bir-birimizge izgi tilekterimizdi aitamyz. Renjiskender tatýlasyp, keshirim jolyn ustanady. Týysqandy ziiarat etý, keshirim jasap, meiirbandyq tanytý – paiǵambar súnnetinen. «Kórshi aqysy – Táńir aqysy», «aralaspasa aǵaiyn jat», – degen naqyl bar. Qasietti Quran men hadis aǵaiynǵa qarailasyp, kórshiniń aqysyn berýdi, keshirim jasaýdy talap etedi.
Naýryz – qaiyrymdylyqtyń merekesi. Bul kúnderi halqymyz jetim men jesirdi jabyrqap, kembaǵal men múgedekke qaiyrymdylyq kórsetken. Jutqa ushyraǵan jandarǵa jumylyp, jylý jinap bergen.
Búginde elimizdiń shyǵys aimaǵynda sý tasqynynan úisiz-kúisiz qalǵan baýyrlarymyzǵa barynsha qoldaý kórsetip, ata-baba dástúrinen jańylmai, musylmandyq ári azamattyq mindetin atqaryp jatqan aǵaiynǵa Alla razy bolsyn degim keledi. Osynaý ortaq saýapty iste din qyzmetkerleri de belsendilik tanytýda.
Qadirli baýyrlar! Barshańyzdy ultymyzdyń ulyq meiramy – Naýryz merekesimen quttyqtaimyn! Kúlli túrki jurtynyń tól toiy – áz Naýryz elimizdegi túrli ultty uiymshyldyqqa uiystyryp, keshirim men meiirimniń merekesine ainalyp keledi.
Dostyq pen tatýlyqtyń, baýyrmaldyqtyń, igilik hám birliktiń, izgilik pen izettiliktiń meiramy qutty bolsyn! Ulys oń bolsyn, aq mol bolsyn!
Alla Taǵala halqymyzǵa árqashan amandyq, jurtymyzǵa tynyshtyq násip etkei! Táýelsizdigimiz baiandy bolǵai!
Barshańyzǵa Jaratqannyń ózi jar bolǵai! Ámin!
Serikbai qajy ORAZ, Qazaqstan musylmandary dini basqarmasynyń tóraǵasy, Bas múfti
