Jambyl oblysy Qarataý bókterindegi Eseihan aýylynda júzdegen turǵyn áli kúnge deiin aýyz sýǵa zárý. Milliondaǵan qarjyǵa salynǵan joba iske aspai, el eski qudyqqa táýeldi bolyp otyr, dep habarlaidy Dalanews.kz.
Atameken business arnasy máseleniń mán-jaiyn tolyq tarqatty. Derekkóz málimetinshe, atalǵan óńirde aýyldar tolyqtai aýyz sýmen qamtyldy degen resmi málimdeme shyndyqqa janaspaidy.
"Júzden asa tútini, myńǵa jýyq turǵyny bar aýylda tirshilik nári tek qaǵaz júzinde ǵana bar. Birneshe jyl buryn iske qosylǵan sý júiesi búginde tolyqtai isten shyqqan. Sonyń saldarynan halyq aýladaǵy eski qudyqtyń sýyn paidalanýǵa májbúr", - deidi derekkóz.
600 mln teńgelik joba nátijesiz
Aýylǵa arnalǵan sý júiesiniń qurylysy 2018 jyly bastalyp, 2020 jyly paidalanýǵa berilgen. Alaida kóp uzamai qubyrlar jarylyp, sý júiesi tolyqqandy jumys istemei qalǵan. Keiingi úsh jylda nysan múlde qoldanylmai tur.
Tirshilik nári jinalýy tiis rezervýar qazir bos tur. Qaqpasy qirap, qabyrǵasy sógilip ketken nysan iesiz qalǵandai kúi keshýde.
"Sý joq. Bir litr emes, jarty litr sý iship otyrǵan joqpyz. Eshkim kelip, jaǵdaiymyzdy kórip jatqan joq", – deidi aýyl turǵyndary.
Joba bastapqydan durys josparlanbaǵan
Júieniń negizgi kemshilikteriniń biri – tehnikalyq jáne geologiialyq eseptiń álsizdigi. Tereńdigi 80 metrge deiin túsirilgen qubyrlardan da sý shyqpaǵan. Al rezervýardyń aýyldan alty shaqyrym qashyqtyqta ornalasýy jaǵdaidy odan ári kúrdelendirgen.
Turǵyndardyń aitýynsha, joba áý bastan durys saraptalmaǵan.
Soǵan qaramastan, resmi esepterde Jambyl oblysy 100 paiyz aýyz sýmen qamtylǵan óńir retinde kórsetiledi. Aýyl halqy bul máseleni aýdan ákimdigine birneshe ret jetkizgen.
"Aýdan ákimi jobanyń durys bolmaǵanyn moiyndady. Buryn oǵan eshkim mán bermegen", - deidi turǵyndar.
Jaýaptylar ketken, másele sheshilmegen
Qazirgi tańda bul joba Talas aýdandyq ákimdigi úshin ózekti máselege ainalǵan. Sebebi merdigerdiń kepildik merzimi aiaqtalǵan. Al jobany iske asyrǵan burynǵy jaýapty tulǵalar qyzmetten ketken.
Tekserý jumystary áli de jalǵasyp jatyr.
Bilik ókilderi máseleni sheshý úshin qosymsha sharalar qabyldap jatqanyn aitady. Byltyr aýyl ishinde 80 metrlik jańa uńǵyma qazylǵan. Mamandardyń sózinshe, jer asty sýynyń deńgeii turaqty.
Endi 16 million teńgege jańa rezervýar ornatý josparlanyp otyr. Kólemi 200 tekshe metr bolatyn nysan eki nasos arqyly sýdy jinaqtap, burynǵy qubyr júiesine qosylady. Jobany mamyr aiynda iske qosý kózdelgen.
Sý qory azaiǵan
Jaýaptylardyń málimetinshe, bastapqy joba 2013 jylǵy saraptamaǵa súienip jasalǵan. Alaida keiin óńirdegi jer asty sý qory kúrt azaiǵan. Sońǵy on jylda sý deńgeii 10 metrge deiin tómendegeni aitylyp otyr.
Qazirgi tańda tek aýyl ishindegi qubyr jelisi ǵana jaramdy kúide qalǵan. Al negizgi infraqurylym nysandarynyń taǵdyry áli belgisiz.
