جامبىل وبلىسى قاراتاۋ بوكتەرىندەگى ەسەيحان اۋىلىندا جۇزدەگەن تۇرعىن ءالى كۇنگە دەيىن اۋىز سۋعا ءزارۋ. ميلليونداعان قارجىعا سالىنعان جوبا ىسكە اسپاي، ەل ەسكى قۇدىققا تاۋەلدى بولىپ وتىر، دەپ حابارلايدى Dalanews.kz.
Atameken business ارناسى ماسەلەنىڭ ءمان-جايىن تولىق تارقاتتى. دەرەككوز مالىمەتىنشە، اتالعان وڭىردە اۋىلدار تولىقتاي اۋىز سۋمەن قامتىلدى دەگەن رەسمي مالىمدەمە شىندىققا جاناسپايدى.
"جۇزدەن اسا ءتۇتىنى، مىڭعا جۋىق تۇرعىنى بار اۋىلدا تىرشىلىك ءنارى تەك قاعاز جۇزىندە عانا بار. بىرنەشە جىل بۇرىن ىسكە قوسىلعان سۋ جۇيەسى بۇگىندە تولىقتاي ىستەن شىققان. سونىڭ سالدارىنان حالىق اۋلاداعى ەسكى قۇدىقتىڭ سۋىن پايدالانۋعا ءماجبۇر"، - دەيدى دەرەككوز.
600 ملن تەڭگەلىك جوبا ناتيجەسىز
اۋىلعا ارنالعان سۋ جۇيەسىنىڭ قۇرىلىسى 2018 جىلى باستالىپ، 2020 جىلى پايدالانۋعا بەرىلگەن. الايدا كوپ ۇزاماي قۇبىرلار جارىلىپ، سۋ جۇيەسى تولىققاندى جۇمىس ىستەمەي قالعان. كەيىنگى ءۇش جىلدا نىسان مۇلدە قولدانىلماي تۇر.
تىرشىلىك ءنارى جينالۋى ءتيىس رەزەرۆۋار ءقازىر بوس تۇر. قاقپاسى قيراپ، قابىرعاسى سوگىلىپ كەتكەن نىسان يەسىز قالعانداي كۇي كەشۋدە.
"سۋ جوق. ءبىر ليتر ەمەس، جارتى ليتر سۋ ءىشىپ وتىرعان جوقپىز. ەشكىم كەلىپ، جاعدايىمىزدى كورىپ جاتقان جوق"، – دەيدى اۋىل تۇرعىندارى.
جوبا باستاپقىدان دۇرىس جوسپارلانباعان
جۇيەنىڭ نەگىزگى كەمشىلىكتەرىنىڭ ءبىرى – تەحنيكالىق جانە گەولوگيالىق ەسەپتىڭ السىزدىگى. تەرەڭدىگى 80 مەترگە دەيىن تۇسىرىلگەن قۇبىرلاردان دا سۋ شىقپاعان. ال رەزەرۆۋاردىڭ اۋىلدان التى شاقىرىم قاشىقتىقتا ورنالاسۋى جاعدايدى ودان ءارى كۇردەلەندىرگەن.
تۇرعىنداردىڭ ايتۋىنشا، جوبا ءاۋ باستان دۇرىس ساراپتالماعان.
سوعان قاراماستان، رەسمي ەسەپتەردە جامبىل وبلىسى 100 پايىز اۋىز سۋمەن قامتىلعان ءوڭىر رەتىندە كورسەتىلەدى. اۋىل حالقى بۇل ماسەلەنى اۋدان اكىمدىگىنە بىرنەشە رەت جەتكىزگەن.
"اۋدان اكىمى جوبانىڭ دۇرىس بولماعانىن مويىندادى. بۇرىن وعان ەشكىم ءمان بەرمەگەن"، - دەيدى تۇرعىندار.
جاۋاپتىلار كەتكەن، ماسەلە شەشىلمەگەن
قازىرگى تاڭدا بۇل جوبا تالاس اۋداندىق اكىمدىگى ءۇشىن وزەكتى ماسەلەگە اينالعان. سەبەبى مەردىگەردىڭ كەپىلدىك مەرزىمى اياقتالعان. ال جوبانى ىسكە اسىرعان بۇرىنعى جاۋاپتى تۇلعالار قىزمەتتەن كەتكەن.
تەكسەرۋ جۇمىستارى ءالى دە جالعاسىپ جاتىر.
بيلىك وكىلدەرى ماسەلەنى شەشۋ ءۇشىن قوسىمشا شارالار قابىلداپ جاتقانىن ايتادى. بىلتىر اۋىل ىشىندە 80 مەترلىك جاڭا ۇڭعىما قازىلعان. مامانداردىڭ سوزىنشە، جەر استى سۋىنىڭ دەڭگەيى تۇراقتى.
ەندى 16 ميلليون تەڭگەگە جاڭا رەزەرۆۋار ورناتۋ جوسپارلانىپ وتىر. كولەمى 200 تەكشە مەتر بولاتىن نىسان ەكى ناسوس ارقىلى سۋدى جيناقتاپ، بۇرىنعى قۇبىر جۇيەسىنە قوسىلادى. جوبانى مامىر ايىندا ىسكە قوسۋ كوزدەلگەن.
سۋ قورى ازايعان
جاۋاپتىلاردىڭ مالىمەتىنشە، باستاپقى جوبا 2013 جىلعى ساراپتاماعا سۇيەنىپ جاسالعان. الايدا كەيىن وڭىردەگى جەر استى سۋ قورى كۇرت ازايعان. سوڭعى ون جىلدا سۋ دەڭگەيى 10 مەترگە دەيىن تومەندەگەنى ايتىلىپ وتىر.
قازىرگى تاڭدا تەك اۋىل ىشىندەگى قۇبىر جەلىسى عانا جارامدى كۇيدە قالعان. ال نەگىزگى ينفراقۇرىلىم نىساندارىنىڭ تاعدىرى ءالى بەلگىسىز.
