Túrkistan oblysy ákiminiń orynbasary Saken Qalqamanov bastaǵan nasihattyq toby Kentaý halqymen júzdesti. Alǵashqy kezdesý 1300 adamdy jumyspen qamtyp otyrǵan Kentaý transformator zaýytynda ótti.
Oblys ákiminiń orynbasary óńirdegi bilim salasyn jetildirý men bala quqyǵyn qorǵaý, sondai-aq daryndy balalardy qoldaý boiynsha atqarylatyn tyń jumystarǵa toqtaldy.
Jiynda Qoja Ahmet Iasaýi atyndaǵy Halyqaralyq qazaq-túrik ýniversitetiniń professory Kópjasar Jetpisbaev Joldaýda mindettelgen 5 baǵytty aishyqtap, jeke-jeke toqtalyp ótti. Joldaýdy nasihattaý, túsindirý jiyny Kentaý qalasyndaǵy Sh.Qaldaiaqov atyndaǵy mádeniet saraiynda jalǵasty.
Memleket basshysynyń alǵashqy halyqqa Joldaýynyń júzege asýyna orai ótken jiynda Kentaý qalasynyń ákimi Daýren Mahajanov baiandama jasady. Óz sózinde Kentaý qalasynyń ákimi qala men aýyldardaǵy «Oqýshylar úiiniń» materialdyq - tehnikalyq bazalary eskirgendikten, tolyqtai jańartylatynyn atap ótti. Sondai-aq bala quqyǵyn qorǵaý komissiiasynyń quramy jańaryp, komissiia jumysy ashyq ári ádil bolý úshin onda qoǵamdyq jumystarǵa belsene aralasatyn qoǵamdyq uiym ókilderi men blogerler tartylmaq. Mundai kezdesýler Túrkistan oblysyna qarasty barlyq aýdan, qalalarda ótkizilýde.
Túrkistan oblysy ákiminiń baspasóz qyzmeti
