Búgin medısına qyzmetkerleriniń kásibı merekesine oraı oblys ortalyǵynda saltanatty jıyn ótti. Sharaǵa Batys Qazaqstan oblysynyń ákimi Narıman Tóreǵalıev qatysyp, aq halatty abzal jandardy shyn júrekten quttyqtady.
Saltanatty jıynda aımaq basshysy óńirdegi densaýlyq saqtaý salasynda atqarylyp jatqan jumystarǵa toqtalyp, medısına mamandarynyń qoǵamdaǵy orny erekshe ekenin atap ótti.
«Kúni keshe Memleket basshysy Qasym-Jomart Toqaev medısına qyzmetkerlerin kásibı merekelerimen quttyqtap, olardyń qoǵamdaǵy róli zor ekenin atap ótti. Prezıdent: «Dáriger bolý – júrektiń isi. Biz sizderdiń erlikterińizdi baǵalaımyz»deı kele, aq halatty abzal jandardyń eńbegin eskerip, mártebesin joǵarylatty.
Oblys kóleminde de densaýlyq salasyn qoldaý maqsatynda aýqymdy naqty jumystar atqarylyp keledi», - dedi Narıman Tóreǵalıev.
Óńir basshysy óz sózinde «Aýyldyq densaýlyq saqtaýdy jańǵyrtý» ulttyq jobasy aıasynda oblysymyzda 50 medısınalyq nysannyń qurylysy josparlanyn, onyń búginde 38 nysany paıdalanýǵa berilgenin habarlady. Qalǵan 12 nysannyń qurylysy maýsym-shilde aılarynda aıaqtalmaq.
Sonymen qatar, 2023–2025 jyldar aralyǵynda óńirde densaýlyq saqtaý ınfraqurylymyn damytý baǵytynda:
37 nysanda kúrdeli jóndeý júrgizilse, taǵy 5 nysannyń kúrdeli jóndeý jumystary aıaqtalýǵa jaqyn. Sondaı-aq, 8 modýldik medısınalyq ǵımarat satyp alynyp, qoldanysqa berildi.
2023-24 jyldary oblystaǵy densaýlyq saqtaý uıymdaryna sý jańa 131 sanıtarıalyq avtokólik berildi. 405 birlik medısınalyq qural-jabdyq satyp alynyp, oǵan jergilikti búdjetten 3 mıllıard teńge qarajat bólingen.
Jıyn barysynda sala úzdikterine «Eńbek ardageri» medali jáne QR Densaýlyq saqtaý mınıstrliginiń «Densaýlyq saqtaý isiniń úzdigi» jáne «Densaýlyq saqtaý isine qosqan úlesi úshin» tósbelgileri, “Qurmet” gramotalary, sondaı-aq oblys ákiminiń alǵys hattary tabys etildi.
Merekelik shara konserttik baǵdarlamaǵa ulasty.
