بٷگٸن مەديتسينا قىزمەتكەرلەرٸنٸڭ كەسٸبي مەرەكەسٸنە وراي وبلىس ورتالىعىندا سالتاناتتى جيىن ٶتتٸ. شاراعا باتىس قازاقستان وبلىسىنىڭ ەكٸمٸ ناريمان تٶرەعاليەۆ قاتىسىپ, اق حالاتتى ابزال جانداردى شىن جٷرەكتەن قۇتتىقتادى.
سالتاناتتى جيىندا ايماق باسشىسى ٶڭٸردەگٸ دەنساۋلىق ساقتاۋ سالاسىندا اتقارىلىپ جاتقان جۇمىستارعا توقتالىپ, مەديتسينا ماماندارىنىڭ قوعامداعى ورنى ەرەكشە ەكەنٸن اتاپ ٶتتٸ.
«كٷنٸ كەشە مەملەكەت باسشىسى قاسىم-جومارت توقاەۆ مەديتسينا قىزمەتكەرلەرٸن كەسٸبي مەرەكەلەرٸمەن قۇتتىقتاپ, ولاردىڭ قوعامداعى رٶلٸ زور ەكەنٸن اتاپ ٶتتٸ. پرەزيدەنت: «دەرٸگەر بولۋ – جٷرەكتٸڭ ٸسٸ. بٸز سٸزدەردٸڭ ەرلٸكتەرٸڭٸزدٸ باعالايمىز»دەي كەلە, اق حالاتتى ابزال جانداردىڭ ەڭبەگٸن ەسكەرٸپ, مەرتەبەسٸن جوعارىلاتتى.
وبلىس كٶلەمٸندە دە دەنساۋلىق سالاسىن قولداۋ ماقساتىندا اۋقىمدى ناقتى جۇمىستار اتقارىلىپ كەلەدٸ», - دەدٸ ناريمان تٶرەعاليەۆ.
ٶڭٸر باسشىسى ٶز سٶزٸندە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وبلىسىمىزدا 50 مەديتسينالىق نىساننىڭ قۇرىلىسى جوسپارلانىن, ونىڭ بٷگٸندە 38 نىسانى پايدالانۋعا بەرٸلگەنٸن حابارلادى. قالعان 12 نىساننىڭ قۇرىلىسى ماۋسىم-شٸلدە ايلارىندا اياقتالماق.
سونىمەن قاتار, 2023–2025 جىلدار ارالىعىندا ٶڭٸردە دەنساۋلىق ساقتاۋ ينفراقۇرىلىمىن دامىتۋ باعىتىندا:
37 نىساندا كٷردەلٸ جٶندەۋ جٷرگٸزٸلسە, تاعى 5 نىساننىڭ كٷردەلٸ جٶندەۋ جۇمىستارى اياقتالۋعا جاقىن. سونداي-اق, 8 مودۋلدٸك مەديتسينالىق عيمارات ساتىپ الىنىپ, قولدانىسقا بەرٸلدٸ.
2023-24 جىلدارى وبلىستاعى دەنساۋلىق ساقتاۋ ۇيىمدارىنا سۋ جاڭا 131 سانيتارييالىق اۆتوكٶلٸك بەرٸلدٸ. 405 بٸرلٸك مەديتسينالىق قۇرال-جابدىق ساتىپ الىنىپ, وعان جەرگٸلٸكتٸ بيۋدجەتتەن 3 ميلليارد تەڭگە قاراجات بٶلٸنگەن.
جيىن بارىسىندا سالا ٷزدٸكتەرٸنە «ەڭبەك ارداگەرٸ» مەدالٸ جەنە قر دەنساۋلىق ساقتاۋ مينيسترلٸگٸنٸڭ «دەنساۋلىق ساقتاۋ ٸسٸنٸڭ ٷزدٸگٸ» جەنە «دەنساۋلىق ساقتاۋ ٸسٸنە قوسقان ٷلەسٸ ٷشٸن» تٶسبەلگٸلەرٸ, “قۇرمەت” گراموتالارى, سونداي-اق وبلىس ەكٸمٸنٸڭ العىس حاتتارى تابىس ەتٸلدٸ.
مەرەكەلٸك شارا كونتسەرتتٸك باعدارلاماعا ۇلاستى.
