Túrkistan oblysynyń ákimi Darhan Satybaldynyń tóraǵalyǵymen agroónerkásip kesheninde ınvestısıalyq jobalardy júzege asyrý máselesi talqylanǵan májilis ótti, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Aýyl sharýashylyǵy salasynda júzege asyp jatqan jáne alda qolǵa alynatyn jobalar týraly maǵlumat berilip, jaýapty basshylardyń esepteri tyńdaldy. Óńir basshysy aýdan, qala ákimderi men Oblystyq aýyl sharýashylyǵy basqarmasynyń basshysyna, «Túrkistan» ÁKK basshylyǵyna tıisti tapsyrmalar berdi.
– Bizge tyń ıdeıalar men jańa jobalar qajet. Barlyq aýdan, qala ákimi aýyl sharýashylyǵyna ınvestısıa tartyp, ónimdi tereń óńdeýge basymdyq berýi tıis. Sý únemdeý tehnologıasyn engizý, jańa tásilderdi qoldaný, egistikti ártaraptandyrý mańyzdy. Naqty jospar, júıeli jumys qajet, – dedi Darhan Satybaldy.
Májiliste Oblystyq aýyl sharýashylyǵy basqarmasynyń basshysy Nurbek Badyraqov pen jaýapty basshylardyń baıandamalary tyńdaldy. Agroónerkásip kesheniniń ár salasy boıynsha tartylatyn ınvestısıa boıynsha maǵlumat berildi.
2024 jyldyń 10 aıynda agroónerkásip kesheniniń negizgi kapıtalyna 130 mlrd teńge tartylyp, ótken jyldyń osy kezeńimen salystyrǵanda 1,5 ese artty. 2024-2030 jyldary aralyǵyndaǵy óńirde aýyl sharýashylyǵyna 556 mlrd teńge ınvestısıa tartylyp, 336 joba júzege asady dep josparlanǵan. Osy arqyly 12 myńnan asa jumys ornyn ashý kózdelgen. Al bıylǵy 10 aıda AÓK-te 30 joba júzege asyp, 237 jumys orny ashyldy.
Oblys ákimi josparlar qaǵaz júzinde qalmaı naqty iske asýy kerektigin aıtty. Aýdan, qala ákimderine osy baǵyttaǵy jumysty kúsheıtý jóninde tapsyrma berdi. Jobalar áli de júıelenip, tıisti jumystar atqarylady.
