تۇركىستان وبلىسىنىڭ اكىمى دارحان ساتىبالدىنىڭ توراعالىعىمەن اگروونەركاسىپ كەشەنىندە ينۆەستيسيالىق جوبالاردى جۇزەگە اسىرۋ ماسەلەسى تالقىلانعان ءماجىلىس ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

اۋىل شارۋاشىلىعى سالاسىندا جۇزەگە اسىپ جاتقان جانە الدا قولعا الىناتىن جوبالار تۋرالى ماعلۇمات بەرىلىپ، جاۋاپتى باسشىلاردىڭ ەسەپتەرى تىڭدالدى. ءوڭىر باسشىسى اۋدان، قالا اكىمدەرى مەن وبلىستىق اۋىل شارۋاشىلىعى باسقارماسىنىڭ باسشىسىنا، «تۇركىستان» اكك باسشىلىعىنا ءتيىستى تاپسىرمالار بەردى.

– بىزگە تىڭ يدەيالار مەن جاڭا جوبالار قاجەت. بارلىق اۋدان، قالا اكىمى اۋىل شارۋاشىلىعىنا ينۆەستيسيا تارتىپ، ءونىمدى تەرەڭ وڭدەۋگە باسىمدىق بەرۋى ءتيىس. سۋ ۇنەمدەۋ تەحنولوگياسىن ەنگىزۋ، جاڭا تاسىلدەردى قولدانۋ، ەگىستىكتى ءارتاراپتاندىرۋ ماڭىزدى. ناقتى جوسپار، جۇيەلى جۇمىس قاجەت، – دەدى دارحان ساتىبالدى.

ماجىلىستە وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ پەن جاۋاپتى باسشىلاردىڭ باياندامالارى تىڭدالدى. اگروونەركاسىپ كەشەنىنىڭ ءار سالاسى بويىنشا تارتىلاتىن ينۆەستيسيا بويىنشا ماعلۇمات بەرىلدى.

2024 جىلدىڭ 10 ايىندا اگروونەركاسىپ كەشەنىنىڭ نەگىزگى كاپيتالىنا 130 ملرد تەڭگە تارتىلىپ، وتكەن جىلدىڭ وسى كەزەڭىمەن سالىستىرعاندا 1،5 ەسە ارتتى. 2024-2030 جىلدارى ارالىعىنداعى وڭىردە اۋىل شارۋاشىلىعىنا 556 ملرد تەڭگە ينۆەستيسيا تارتىلىپ، 336 جوبا جۇزەگە اسادى دەپ جوسپارلانعان. وسى ارقىلى 12 مىڭنان اسا جۇمىس ورنىن اشۋ كوزدەلگەن. ال بيىلعى 10 ايدا اوك-تە 30 جوبا جۇزەگە اسىپ، 237 جۇمىس ورنى اشىلدى.

وبلىس اكىمى جوسپارلار قاعاز جۇزىندە قالماي ناقتى ىسكە اسۋى كەرەكتىگىن ايتتى. اۋدان، قالا اكىمدەرىنە وسى باعىتتاعى جۇمىستى كۇشەيتۋ جونىندە تاپسىرما بەردى. جوبالار ءالى دە جۇيەلەنىپ، ءتيىستى جۇمىستار اتقارىلادى.