Olardyń aitýynsha, kómir shahtalaryndaǵy jabdyqtardyń jai-kúii, sondai-aq óndiriste eńbek etetin jumysshylardyń bei-bereket qysqartylýy osyndai qaiǵyly oqiǵanyń oryn alýyna sebep boldy.
– Buǵan deiin «AMANAT» partiiasynyń depýtattary qarajat únemdep, otandastarymyzdyń ólimine ákep soqtyrarlyq sheshim qabyldaityn kompaniianyń top-menedjmentin – sheteldik azamattaryn qylmystyq jaýapqa tartýdy talap etken edi.
Birneshe eskertýge qaramastan, transulttyq kompaniianyń basshysy, Mittal myrza otandastarymyz apatqa ushyramaýy, jaraqattanbaýy jáne qaza tappaýy úshin tiisti shara qabyldaýǵa múldem tyryspady.
Biz bul sózimizdi Úkimetke qarata aityp otyrmyz: esep aiyrysatyn kez keldi – Mittal myrzamen jolymyz bir emes! Onymen qoshtasatyn ýaqyt keldi! – delinedi málimdemede.
Halyq qalaýlylary Bas Prokýrorǵa júginip, «Arselor Mittal Temirtaý» AQ basshylyǵyn jaýapqa tartýdy talap etti.
– Mittal úshin otandastarymyz jai ǵana shyǵyn materialy ispetti. Qynjylmai qutyla salady. Bizge mundai investordyń keregi joq, – dedi depýtat Snejanna Imasheva.
Al májilismen, «AMANAT» fraktsiiasynyń múshesi Nikita Shatalov Lakshmi Mittal keiingi jyldary oryn alǵan barlyq qaiǵyly oqiǵadan qorytyndy shyǵarmaǵanyn, al kompaniia menedjmenti úshin otandastarymyzdyń qazaǵa ushyrap jatqany jáne olardyń densaýlyǵyna udaiy qaýip tónip turǵany mańyzdy másele emes ekenin atap ótti.
– Biz kómir óndirý jáne baiytý, bolat balqytý tehnologiiasyn damytýdyń ondaǵan jylyn joǵalttyq. Ol az bolǵandai, osy nysandarda otandastarymyzdan aiyrylyp qalyp jatyrmyz. Budan arylýdyń bir ǵana joly bar – memleket Mittaldyń kompaniiasyn elden shyǵaryp, Qazaqstannyń jer qoinaýy men otandyq ónerkásipti paidalanýy týraly onymen jasalǵan barlyq kelisimdi buzýy kerek. Budan bylai mundai soraqylyqqa nege tóze berýimiz kerek ekenin túsinbeimin. «Arselor» otandastarymyzdyń ólimimen baiyp otyr, – dedi depýtat.
Eske sala keteiik, buǵan deiin májilismen Erlan Sairov Lakshmi Mittal Qazaqstan halqynyń osynaý igiligin esh aýyrtpalyqsyz, sý teginge alǵanyn, al «Arselor Mittal Temirtaý» kompaniiasy taýarlar men qyzmetterdi jetkizýshi qazaqstandyq kásipkerlerge shamamen 700 mln teńge qaryz ekenin aitqan edi.
Aita keteiik, partiianyń «Halyqpen birge!» sailaýaldy baǵdarlamasy aiasynda aldaǵy bes jylda amanattyqtar memleket pen qoǵam tarapynan jumys berýshiniń jaýapkershiligi men jumysshynyń qaýipsizdigin baqylaýdy kúsheitýdi kózdeidi. Buǵan qosa, eńbekti qorǵaý jónindegi eń tómengi standarttar jetildiriledi. Ziiandy jáne qaýipti óndiristegi barlyq qyzmetkerdiń ómiri men densaýlyǵy saqtandyrylýǵa tiis.
