Qyrǵyzstanda kontrabandaǵa qatysy bar degen kúdikpen keden jáne shekara qyzmetteriniń 15-ke jýyq qyzmetkeri ustaldy. Bul týraly el prezidenti Sadyr Japarov Batken oblysynyń Leilek aýdanyndaǵy turǵyndarmen kezdesýde málimdedi, dep habarlaidy dalanews.kz.
Japarovtyń aitýynsha, Ulttyq qaýipsizdik memlekettik komiteti jasyryn kamera ornatyp, 15 kún boiy qyzmetkerlerdiń áreketin baqylaǵan. Prezidenttiń sózinshe, beinejazbalarda kedenshiler men shekarashylardyń elge taýar ótkizý kezinde aqsha alǵany kórinedi. Ustalǵandar qamaýǵa alynǵan.
Memleket basshysy 2020 jyly qyzmetine kiriskennen beri keden jáne shekara qyzmetkerlerine kontrabandaǵa jol bermeýdi, importtalatyn taýarlar úshin tiisti baj salyǵyn tóleýdi talap etip kele jatqanyn aitty.
Onyń sózinshe, kedendik túsimder memlekettik biýdjetti tolyqtyrýǵa jáne el ekonomikasyn damytýǵa qajet. Japarov kontrabandaǵa jol berilse, biýdjet kirisin arttyrý jáne óńirlerdiń damýyna qarajat bólý qiyndaitynyn atap ótti.
