Almatyda aiyna 3 million teńgeden astam jalaqy alatyn 6 317 adam bar. Al Astanada mundai qyzmetkerlerdiń sany – 2 784. Eki qalada elimiz boiynsha osyndai joǵary jalaqy alatyndardyń 62 paiyzdan astamy turady. Bul týraly Ulttyq statistika biýrosynyń 2026 jylǵy jalaqy mólsherine qatysty zertteýinde aitylǵan, dep habarlaidy dalanews.kz.
Zertteý derekterine sáikes, Almatyda aiyna 1 million teńgeden astam jalaqy alatyn 52 118 adam bar. Bul – Astanadaǵy kórsetkishten shamamen 1,6 ese kóp. Elordada mundai qyzmetkerlerdiń sany 32 128 adamdy quraidy.
Alaida zertteýge qatysqan qyzmetkerlerdiń jalpy sanyndaǵy úlesi boiynsha eki qala arasyndaǵy aiyrmashylyq onsha úlken emes. Almatyda jumysshylardyń 11,4 paiyzy, al Astanada 10,6 paiyzy aiyna 1 million teńgeden astam tabys tabady.
Qazaqstan boiynsha mundai jalaqy alatyndardyń sany 187 994 adamǵa jetken. Bul zertteýge qamtylǵan qyzmetkerlerdiń 5,6 paiyzyna teń.
Sonymen qatar zertteýge qatysqan jumysshylardyń 59,9 paiyzy aiyna 400 myń teńgeden aspaityn jalaqy alady.
Aita keteiik, zertteý 2026 jylǵy sáýirde eseptelgen jalaqy kólemine negizdelgen. Onda eldegi barlyq jumyspen qamtylǵan azamattar qamtylmaǵan. Atap aitqanda, ózin-ózi jumyspen qamtyǵandar men shaǵyn biznestegi keibir qyzmetkerler zertteýge kirmegen.
Zertteýde kórsetilgen jalaqy mólsheri salyqtar men basqa da mindetti tólemder ustalmaǵanǵa deiingi somany bildiredi.
