الماتىدا ايىنا 3 ميلليون تەڭگەدەن استام جالاقى الاتىن 6 317 ادام بار. ال استانادا مۇنداي قىزمەتكەرلەردٸڭ سانى – 2 784. ەكٸ قالادا ەلٸمٸز بويىنشا وسىنداي جوعارى جالاقى الاتىنداردىڭ 62 پايىزدان استامى تۇرادى. بۇل تۋرالى ۇلتتىق ستاتيستيكا بيۋروسىنىڭ 2026 جىلعى جالاقى مٶلشەرٸنە قاتىستى زەرتتەۋٸندە ايتىلعان, دەپ حابارلايدى dalanews.kz.
زەرتتەۋ دەرەكتەرٸنە سەيكەس, الماتىدا ايىنا 1 ميلليون تەڭگەدەن استام جالاقى الاتىن 52 118 ادام بار. بۇل – استاناداعى كٶرسەتكٸشتەن شامامەن 1,6 ەسە كٶپ. ەلوردادا مۇنداي قىزمەتكەرلەردٸڭ سانى 32 128 ادامدى قۇرايدى.
الايدا زەرتتەۋگە قاتىسقان قىزمەتكەرلەردٸڭ جالپى سانىنداعى ٷلەسٸ بويىنشا ەكٸ قالا اراسىنداعى ايىرماشىلىق ونشا ٷلكەن ەمەس. الماتىدا جۇمىسشىلاردىڭ 11,4 پايىزى, ال استانادا 10,6 پايىزى ايىنا 1 ميلليون تەڭگەدەن استام تابىس تابادى.
قازاقستان بويىنشا مۇنداي جالاقى الاتىنداردىڭ سانى 187 994 ادامعا جەتكەن. بۇل زەرتتەۋگە قامتىلعان قىزمەتكەرلەردٸڭ 5,6 پايىزىنا تەڭ.
سونىمەن قاتار زەرتتەۋگە قاتىسقان جۇمىسشىلاردىڭ 59,9 پايىزى ايىنا 400 مىڭ تەڭگەدەن اسپايتىن جالاقى الادى.
ايتا كەتەيٸك, زەرتتەۋ 2026 جىلعى سەۋٸردە ەسەپتەلگەن جالاقى كٶلەمٸنە نەگٸزدەلگەن. وندا ەلدەگٸ بارلىق جۇمىسپەن قامتىلعان ازاماتتار قامتىلماعان. اتاپ ايتقاندا, ٶزٸن-ٶزٸ جۇمىسپەن قامتىعاندار مەن شاعىن بيزنەستەگٸ كەيبٸر قىزمەتكەرلەر زەرتتەۋگە كٸرمەگەن.
زەرتتەۋدە كٶرسەتٸلگەن جالاقى مٶلشەرٸ سالىقتار مەن باسقا دا مٸندەتتٸ تٶلەمدەر ۇستالماعانعا دەيٸنگٸ سومانى بٸلدٸرەدٸ.
