Úndistan astanasy Delide sailaý komissiiasynyń jumysyna qarsy ótken narazylyq kezinde myńdaǵan adam ustalyp, oqiǵany jazyp júrgen jýrnalisterdiń de politsiia bólimshelerine jetkizilgeni týraly habarlandy, dep habarlaidy dalanews.kz.
2026 jylǵy 10 qazanda Delide jastardyń «Cockroach» qozǵalysy uiymdastyrǵan narazylyq aktsiiasy ótti. Demonstranttar Úndistannyń Bas sailaý komissary Gianesh Kýmardyń otstavkaǵa ketýin jáne sailaýshylar tizimin qaita qaraýdy toqtatýdy talap etti. Oppozitsiia bul úderis milliondaǵan azamattyń daýys berý quqyǵyna nuqsan keltirdi dep esepteidi. Al Úndistannyń Sailaý komissiiasy men úkimet bul aiyptaýlardy joqqa shyǵaryp, ózgerister qaitalanatyn jáne jaramsyz jazbalardy alyp tastaýǵa baǵyttalǵanyn málimdedi.
Associated Press agenttiginiń habarlaýynsha, politsiia narazylyq bastalmai turyp-aq qatysýshylardy ustap, qozǵalys jetekshilerin, oppozitsiia ókilderi men stýdent belsendilerdi ýaqytsha ustaý oryndaryna jetkizgen. Qaladaǵy birqatar aýmaqta bes nemese odan kóp adamnyń jinalýyna shekteý qoiylyp, narazylyq ótetin jer qorshaýǵa alynǵan. Kei aýdandarda mobildi internetke de shekteý engizilgen.
Oqiǵany jazyp júrgen jýrnalister de politsiia áreketine tap bolǵan. Úndistandaǵy tórt jýrnalistik uiymnyń málimdeýinshe, baspasóz kýáligi bar tilshiler ustalyp, keibiriniń telefondary men jumys quraldary tárkilengen. Jýrnalisterdi Chhatrasal stadiony men Chanakiapýri politsiia bólimshesine jetkizgeni habarlandy. Uiymdar ustalǵan jýrnalisterdi bosatýdy talap etip, bolǵan jaǵdaidy baspasóz bostandyǵyna tóngen qaýip dep baǵalady.
Buǵan deiin de politsiianyń áreketine qatysty shaǵymdar aitylǵan. 3 qazandaǵy narazylyq kezinde úsh áiel jýrnalist politsiia qyzmetkerleri tarapynan jynystyq sipattaǵy tiisý bolǵanyn málimdegen. Delidiń politsiiasy shaǵymdardyń qylmystyq isterdi tergeý bólimine jiberilgenin jáne ádil tekserý júrgiziletinin habarlaǵan. Bul aiyptaýlar ázirge tergeý nátijesimen rastalǵany týraly málimet joq.
Úndistandaǵy narazylyqtar sailaýshylar tizimin qaita qaraý tóńiregindegi daýdan týyndaǵan. Oppozitsiia bilikti sailaý úderisine yqpal etti dep aiyptasa, bilik pen Sailaý komissiiasy muny teriske shyǵarady. Jýrnalisterdiń ustalǵany jónindegi habarlar eldegi narazylyq ótkizý quqyǵy men baspasóz erkindigine qatysty pikirtalasty kúsheitti.
