Үндістан астанасы Делиде сайлау комиссиясының жұмысына қарсы өткен наразылық кезінде мыңдаған адам ұсталып, оқиғаны жазып жүрген журналистердің де полиция бөлімшелеріне жеткізілгені туралы хабарланды, деп хабарлайды dalanews.kz.
2026 жылғы 10 қазанда Делиде жастардың «Cockroach» қозғалысы ұйымдастырған наразылық акциясы өтті. Демонстранттар Үндістанның Бас сайлау комиссары Гьянеш Кумардың отставкаға кетуін және сайлаушылар тізімін қайта қарауды тоқтатуды талап етті. Оппозиция бұл үдеріс миллиондаған азаматтың дауыс беру құқығына нұқсан келтірді деп есептейді. Ал Үндістанның Сайлау комиссиясы мен үкімет бұл айыптауларды жоққа шығарып, өзгерістер қайталанатын және жарамсыз жазбаларды алып тастауға бағытталғанын мәлімдеді.
Associated Press агенттігінің хабарлауынша, полиция наразылық басталмай тұрып-ақ қатысушыларды ұстап, қозғалыс жетекшілерін, оппозиция өкілдері мен студент белсенділерді уақытша ұстау орындарына жеткізген. Қаладағы бірқатар аумақта бес немесе одан көп адамның жиналуына шектеу қойылып, наразылық өтетін жер қоршауға алынған. Кей аудандарда мобильді интернетке де шектеу енгізілген.
Оқиғаны жазып жүрген журналистер де полиция әрекетіне тап болған. Үндістандағы төрт журналистік ұйымның мәлімдеуінше, баспасөз куәлігі бар тілшілер ұсталып, кейбірінің телефондары мен жұмыс құралдары тәркіленген. Журналистерді Чхатрасал стадионы мен Чанакьяпури полиция бөлімшесіне жеткізгені хабарланды. Ұйымдар ұсталған журналистерді босатуды талап етіп, болған жағдайды баспасөз бостандығына төнген қауіп деп бағалады.
Бұған дейін де полицияның әрекетіне қатысты шағымдар айтылған. 3 қазандағы наразылық кезінде үш әйел журналист полиция қызметкерлері тарапынан жыныстық сипаттағы тиісу болғанын мәлімдеген. Делидің полициясы шағымдардың қылмыстық істерді тергеу бөліміне жіберілгенін және әділ тексеру жүргізілетінін хабарлаған. Бұл айыптаулар әзірге тергеу нәтижесімен расталғаны туралы мәлімет жоқ.
Үндістандағы наразылықтар сайлаушылар тізімін қайта қарау төңірегіндегі даудан туындаған. Оппозиция билікті сайлау үдерісіне ықпал етті деп айыптаса, билік пен Сайлау комиссиясы мұны теріске шығарады. Журналистердің ұсталғаны жөніндегі хабарлар елдегі наразылық өткізу құқығы мен баспасөз еркіндігіне қатысты пікірталасты күшейтті.
